Aqmola oblysy polısııa departamenti baspasóz qyzmetiniń málimetinshe, atalǵan quqyqbuzýshylyq 9 shilde kúni Jarqaıyń aýdanynyń Derjavınsk qalasynda anyqtalǵan.
Polısııa qyzmetkerleri «Volkswagen Passat» markaly avtokóliktiń tizgininde otyrǵan kúdikti júrgizýshini toqtatyp, qajetti shara qoldandy.
«Qujattardy teksergennen keıin polısııa qyzmetkerleri er adamdy medısınalyq kýálandyrýǵa jiberý týraly sheshim qabyldady. Kýálandyrý nátıjeleri boıynsha júrgizýshiniń esirtki qoldanǵany anyqtaldy. Quqyq buzýshy esirtki qoldanǵanyn moıyndap, qalǵan psıhotroptyq zattardy polıseılerge berdi», dep atap ótti vedomstvodan.
Jarqaıyń aýdandyq sotynyń 12 shildedegi qaýlysymen júrgizýshi QR ÁQBtK-niń 608-baby «esirtkiden masań kúıdegi júrgizýshiniń kólik quralyn basqarýy...» boıynsha 15 táýlikke qamaýǵa alynyp, jeti jylǵa kólik quraldaryn júrgizý quqyǵynan aıyryldy.
Sondaı-aq esirtkini zańsyz saqtaǵany úshin ol QR QK 296-babynyń 2-bóligi boıynsha qylmystyq jaýapkershilikke tartyldy.
Jyl basynan beri Aqmola oblysynyń avtojoldarynda mas júrgizýshilerdiń qatysýymen 20 JKO oryn aldy. Olardyń saldarynan 35 azamat zardap shegip, 6 adam qaıtys boldy. Osy ýaqyt ishinde polısııa qyzmetkerleri 654 júrgizýshini ákimshilik jaýapkershilikke jáne 60 júrgizýshini kólikti mas kúıinde basqarǵany úshin qylmystyq jaýapkershilikke tartty.
