Astananyń «Barys» komandasy Qurlyqtyq hokkeı lıgasyndaǵy kezekti oıynynda Tatarstannyń «Ak Bars» klýbymen kezdesip, syrt alańda 2:1 esebimen jeńiske jetti.
Astananyń «Barys» komandasy Qurlyqtyq hokkeı lıgasyndaǵy kezekti oıynynda Tatarstannyń «Ak Bars» klýbymen kezdesip, syrt alańda 2:1 esebimen jeńiske jetti.
Bul matchta birinshi kezeńniń úshinshi mınýty jaqyndaǵanda óz qaqpasyna shaıbany jiberip alǵanymen, «Barystyń» hokkeıshileri oıyn sońyna deıin baryn salyp, aıdyn ıelerine eki shaıbany soǵyp, Qazannan mańyzdy úsh upaıdy áketti. Kezdesýde «Barystyń» qaqpashysy Ahonen tipten jarady. Ol match bastalysymen alań ıeleriniń talaı ret qaqpaǵa soqqan shaıbalaryn qaıtaryp, «Ak Barsqa» esep teńestirýdiń ózine eshqandaı múmkindik bermedi. Al oıynda bizdiń komandadan Mıhaıl Rahmanov esepti ashsa, odan keıin Nıkolaı Antropov ekinshi shaıbanyń avtory atandy. «Ak Barstan» jalǵyz shaıbany Tım Steplton soqty.
Osy jeńisten keıin «Barys» Qurlyqtyq hokkeı lıgasynyń «Shyǵys» dıvızıonynda birinshi orynda turǵan «Ak Barsqa» bir upaıǵa jaqyndady. Qazir Tatarstannyń komandasy 44 oıynnan keıin 86 upaı jınap, týrnır kestesiniń kósh basynda tursa, «Barys» 43 kezdesýde 85 upaı ıelenip, ekinshi orynda qaldy. Odan keıin bizdiń komandanyń ókshesin Magnıtogorskiniń «Metallýrgy» basyp keledi. Olar 43 oıynnan keıin 84 upaı jınap otyr.
Endi «Barys» kelesi matchyn taǵy da syrt alańda ótkizedi. Bul joly otandastarymyz 9 qańtar kúni Nıjnıı Novgorod qalasynda jergilikti «Torpedo» komandasymen kezdesedi.
Dastan KENJALIN,
«Egemen Qazaqstan».
