Mınıstrlik usynǵan málimetke sáıkes, bıyl 1050 shaqyrym sýarý jelisin qaıta qurý josparlanǵan.
«Búginde respýblıkalyq menshikte uzyndyǵy 21,5 myń shaqyrymdy quraıtyn 3 298 sýarý jelisi bar. Onyń ishinde 11,9 myń shaqyrym jeliniń jaǵdaıy nashar. Sonyń saldarynan fermerlerge sý jetkizýde shyǵyn kóp. Aýyl sharýashylyǵynda negizgi sý tutynýshy sýarmaly eginshilik salasy bolyp otyr. Osy oraıda Memleket basshysynyń tapsyrmasyna sáıkes biz sýarmaly jer kólemin 2030 jylǵa deıin 1,6 mln gektardan 3,0 mln gektarǵa deıin jetkizýimiz qajet. Bul maqsatqa jetý úshin 2019-2020 jyldary 1734 shaqyrymdy quraıtyn kanal jóndelip, 111,5 myń gektar sýarmaly jer aınalymǵa engizildi. Bul óz kezeginde qosymsha 22,3 myń jumys ornyn qurýǵa jáne aýyl sharýashylyǵy óniminiń kólemin jyl saıyn 94,8 mıllıard teńgege ulǵaıtýǵa múmkindik beredi», dedi Maǵzum Myrzaǵalıev.
Ekologııa mınıstri 41 apatty sý qoımasynyń qaıta qalpyna keltirilip jatqanyn habarlady. 2017-2019 jyldary 10 nysan paıdalanýǵa berilse, ótken jyly 2 nysan daıyn bolǵan. Al bıyl 8 sý qoımasyn qaıta qalpyna keltirý jumysyn aıaqtaý josparlanýda.
Qalǵan 21 nysan boıynsha jóndeý jumystary 2025 jylǵa deıin júzege asyrylatyny belgili boldy.
