El turǵyndary memlekettik qyzmet salasyna jıi shaǵymdanyp jatady. Biraq halyqtyń biri ótinishi qaralsa, ekinshisi quzyretti organ nazarynan tys qalatyny bar. Al azamattardyń memlekettik organdarǵa joldaǵan aryz-shaǵymdary qanshalyqty qaralyp, oryndalǵanyn baqylaıtyn biryńǵaı júıe bolǵan emes. Endi jańadan jumys isteı bastaǵan eOtinish elektrondy qyzmeti birde-bir aryz-shaǵymnyń jerde qalmaýyn qamtamasyz etedi, deıdi Sıfrlyq damý, ınnovasııalar jáne aeroǵarysh ónerkásibi vıse-mınıstri Áset Turysov. «Buryn bizde azamattardyń ótinishterin qaraıtyn, oryndalýyn qadaǵalap otyratyn júıe bolǵan joq, sondyqtan biz qandaı da bir taldaý júrgizip, ótinishterdiń qaralý prosesin baqylaı almadyq. Mundaı derek qolymyzda bolmaıynsha memlekettik mekemelerdiń jumys sapasyn baǵalaý jáne ótinish berýshilerdiń qaı salaǵa kóbirek shaǵymdanatynyn anyqtaý da qıyn. EOtinish elektrondy ótinishter júıesin engizý – osy máselelerdi sheshedi», deıdi Á.Turysov.
Mınıstrlik bul júıe memlekettik organdar jumysynyń tıimdiligin arttyratynyna senip otyr. Al kelip túsken aryz-shaǵymdar Ákimshilik rásimdik-prosestik kodeks boıynsha 15 jumys kúnniń ishinde qaralyp, jaýap berilýge mindetti.
Vıse-mınıstrdiń túsindirýinshe, ótinishterdi eki jolmen berýge bolady. Turǵyndar halyqqa qyzmet kórsetý ortalyqtaryna, ákimdikke nemese memlekettik organǵa kelip, ótinishin qaldyrady. Qazir HQO-larda eotinish arqyly ótinishterdi qabyldaıtyn arnaıy pýnktter ashylǵan. Olardyń sany – 259. HQO operatory jeke kabınette azamattyń ótinishin qabyldap, ony eOtinish júıesine tirkeıdi. Memlekettik organdar qyzmetkerleri qabyldaǵan ótinishti júıege qosady.
«EOtinish júıesi árbir aýyl ákimdiginde de ornatylady. Ákimdikterdiń qyzmetkerleri júıeni paıdalaný jóninde arnaıy oqýdan ótti. Endi olar osy elektrondy júıe arqyly jergilikti turǵyndardyń aryz-shaǵymyn qabyldamaq. Aýyl turǵyndary memlekettik mekemelerge degen qandaı da bir ótinish-usynysy bolsa, ákimdikterge baryp, aryzyn júıege tirkete alady. Al eger HQO nemese memlekettik organǵa baratyn ýaqyty bolmasa, onda ótinishti eGov portaly, eOtinish, eGov mobile, aitu mobıldik qosymshalary arqyly berýge bolady», deıdi Á.Turysov.
EOtinish elektrondyq júıesiniń ereksheligi sol, árbir azamat óziniń ótinishi qaıda, qandaı mekemege joldanǵanyn, qaı kezde qaralǵanyn júıe arqyly qarap, baqylaı alady. Sonymen qatar aryz-shaǵymyna degen memlekettik mekemeniń jaýabyn baǵalaýǵa da múmkindigi bar. Osy arqyly tıisti organdardyń halyqqa qyzmet kórsetý sapasyn saralaýǵa bolady.
Júıede ótinishi tirkelgen azamattarǵa SMS-habarlama arqyly aryz-shaǵymynyń qaralý kezeńderi týraly habarlamalar jiberiledi. Onyń qaralý tarıhy júıede saqtalady jáne memlekettik organ buryn qandaı sheshim qabyldanǵanyn saralaı otyryp, ákimshilik is qalyptastyra alady.
Eotinish elektrondy ótinishter júıesiniń bas operatory – «Azamattarǵa arnalǵan úkimet» memlekettik korporasııasy. Korporasııanyń mindeti – eOtinish arqyly alynǵan derekterge taldaý júrgizedi. Mundaı taldaý jumystary elimizdiń ár óńirindegi turǵyndardy qandaı másele kóbirek tolǵandyratynyn, memlekettik organdar qanshalyqty tıimdi jumys isteıtinin anyqtaýǵa múmkindik beredi eken.
