Bıznes joly ońaı emes. «Alǵashqy kezde bıznesti sen asyraısyń, sodan keıin bıznes ózin-ózi asyraıdy, sosyn bıznes seni asyraıdy» degen sóz beker aıtylmasa kerek. Kásibi dóńgelenip ketkender de, orta joldan toqtap qalǵandar da bar. Resmı derekterge súıensek, byltyr kúzde elimizde tirkelgen jeke kásipkerliktiń sany 1,2 mln-nan asypty. Biraq bir jyldyń ishinde olardyń sany 2,9%-ǵa qysqarǵan. Tirkelgen jeke kásipkerliktiń ishinde 200 myńdaıy jumysyn toqtatqan. Olardyń ishinde resmı túrde kásibin toqtatý týraly ótinish bermegender de bar. Memlekettik kirister komıteti jeke kásipkerlik jabylǵan bolsa, mindetti túrde salyq organdaryna habarlasyp, qyzmeti toqtaǵany jóninde ótinim qaldyrý kerektigin eskertedi. Kásipkerler bıznestiń túrine qaraı jylyna eki ret deklarasııa tapsyrady. Osy esepti tapsyrmaǵandarǵa ákimshilik jaýapkershilik qarastyrylǵan. Sondyqtan kásipker qyzmeti jóninde mindetti túrde tıisti mekemeni habardar etýi kerek.
Memlekettik kirister komıteti basqarma basshysynyń orynbasary Aınur Sartaevanyń aıtýynsha, kásipkerdiń basynda salyq qaryzy bolmasa, onda jeke tulǵany dara kásipker jáne jeke praktıkamen aınalysatyn tulǵa retinde tirkeýden shyǵarýdy salyq organy júzege asyrady. «Dara kásipker nemese jeke praktıkamen aınalysatyn adam qyzmetti toqtatý týraly sheshim qabyldaǵan kezde tirkelgen jerindegi salyq organyna baryp, qyzmetti toqtatý týraly salyqtyq ótinishti, qyzmettiń jekelegen túrimen aınalysatyn salyq tóleýshi retinde qyzmettiń bastalǵany nemese toqtatylǵany týraly habarlamany, taratý týraly salyq esebi jáne baqylaý-kassa mashınasyn esepten shyǵarý týraly salyqtyq ótinishti (eger bar bolsa) tapsyrýy kerek», deıdi A.Sartaeva.
Jeke kásipkerlikti ońaılatylǵan tártipte jabýǵa bolady. Bul kameraldyq baqylaýsyz júzege asyrylady. Ońaılatylǵan tártippen qyzmetti toqtatý úshin jeke kásipker qosymsha qun salyǵyn tóleýshi retinde tirkeýde turmaıtyn, birlesken kásipkerlik túrindegi qyzmetti júzege asyrmaıtyn bolýy kerek. Sondaı-aq kásibi myna qyzmet túrlerimen baılanysty bolmaýǵa tıis: benzın (avıasııalyqty qospaǵanda), dızel otynyn óndirý, benzındi, dızel otynyn kóterme nemese bólshek saýdada ótkizý, etıl spırtin jáne alkogol ónimin óndirý, olardy kóterme jáne bólshek saýdada satý, temeki ónimderin óndirý jáne olardy kóterme saýdada ótkizý, oıyn bıznesi, taýarlardyń elektrondy saýdasy. Buǵan qosa, salyqtyq tekserýler men táýekelderdi baǵalaý júıesiniń nátıjeleri boıynsha iriktelgen salyq tekserýlerdiń tiziminde joqtyǵy, salyqtar men áleýmettik tólemder boıynsha qaryzdary bolmaǵany eskeriledi. Qyzmetti toqtatý týraly salyqtyq ótinishti onlaın rejiminde salyq tóleýshiniń keńsesi arqyly da berýge bolatynyn esterińizge salamyz.
«Jeke kásipker retinde qyzmetin toqtatatyn taǵy bir ádis patenttiń qoldanylý merzimi aıaqtalǵan kúnnen bastalady. Alaıda kásipkerlik qyzmetin toqtata turý merzimi aıaqtalǵannan keıin patent qunynyń kelesi esebi kúntizbelik alpys kún ishinde usynylmasa, onda salyq organy patent boıynsha jumys isteıtin dara kásipkerlerdiń qyzmetin ońaılatylǵan tártippen toqtatady», deıdi komıtet ókili.
Jeke kásipkerdi nemese jeke praktıkamen aınalysatyn adamdy tirkeýden shyǵarý týraly aqparat ýákiletti organnyń www.kgd.gov.kz ınternet-resýrsynda «Elektrondy servıster/salyq tóleýshilerdi izdeý» bóliminde nemese «E-Salyq Azamat» mobıldi qosymshasynda esepten shyǵarǵan kúnnen bastap, úsh jumys kúni ishinde ornalastyrylady.
