Ishki ister mınıstrligi taratqan aqparatqa sáıkes, Covid-19 koronavırýs ınfeksııasy saldarynan kóptegen adamnyń ómiri qıylýda. Tek bir táýlik ishinde Qazaqstanda qaýipti ınfeksııaǵa oń PTR-taldaýy bar 5648 naýqas anyqtaldy. Barlyq qabyldanǵan shekteý sharalaryna qaramastan, bul san kún saıyn ósip keledi.
IIM-niń asa alańdatarlyq epıdemıologııalyq jaǵdaıyn eskere otyryp, Memleket basshysynyń tapsyrmasy boıynsha osy aýrýmen baılanysty barlyq qylmystyq kórinisterge erekshe kóńil bólinedi. Jalǵan PTR testileri men vaksınasııa pasporttaryn qoldan jasaý jáne paıdalanýshylardy anyqtaý baǵytyndaǵy jumystar belsendi júrgizilýde, óıtkeni vaksınasııalanbaǵan azamattar koronavırýstyń taralýyna jaǵdaı jasap, basqalarǵa juqtyrý qaýpin joǵarylatady.
Tergeý bólimsheleriniń óndirisinde PTR-testilerdi qoldan jasaý, daıyndaý nemese ótkizý boıynsha Qylmystyq kodekstiń 385-baby boıynsha 42 qylmystyq is boldy (QK 385-baby 1-bóligi-23, 2-bóligi-3, 3-bóligi-16), onyń ishinde 39-y aǵymdaǵy jyly tirkelgen. Vaksına pasportyn qoldan jasaý faktileri boıynsha aǵymdaǵy jyly 23 qylmystyq is tirkeldi, tergeý jalǵasýda.
Qoldan jasalǵan qujattardyń sany jáne árbir is boıynsha zańǵa qaıshy áreketterge qatysýshylardyń sany da ár túrli. Bular tergeý nátıjeleri boıynsha naqtylanatyn bolady. Ishki ister organdary jalǵan PTR-anyqtamalar men vaksına pasportyn satý faktilerin anyqtaý boıynsha túrli jedel-izdestirý is-sharalaryn júrgizýde.
Polısııa qyzmetkerleri medısınalyq ortalyqtardy, emhanalardy, vaksına alý pýnktterin tekserýdi jalǵastyrýda. IIM jalǵan qujat jasaǵany úshin 4 jylǵa deıin bas bostandyǵynan aıyrý túrindegi qylmystyq jaýapkershilik, al ony paıdalanǵany úshin 40 táýlikke deıin qamaýǵa alý kózdelgenin eske salady.
