– Batyrs Battle elimizdiń tórt qalasynda – О́skemende, Aqtóbede, Túrkistanda jáne Nur-Sultanda ótedi. Kúni keshe shyǵystyń bas shaharynda jarys alaýy jaǵyldy. Sátin salsa, Qajymuqan, Balýan Sholaq aınalysqan jattyǵýdy halyq arasynda nasıhattaǵymyz keledi. Babalarymyzdyń bilek kúshterin búgingi urpaq sezinse eken, – dep óz oıymen bólisti Mádenıet jáne sport mınıstrliginiń ambassadory Sergeı Syrýlnıkov.
Elimizde buryn-sońdy uıymdastyrylmaǵan erekshe jobaǵa qatysamyz dep kelgen jigitter de tepse temir úzerdeı eken. Olardyń ishinde Halyqaralyq dárejedegi sport sheberleri de boldy. Deı turǵanmen, Qajymuqan aınalysqan sport olar úshin ońaıǵa soqpady. Ártúrli salmaqtaǵy qaptardy, zildeı tasty kóterdi. Jýan temirdi maıystyryp kórdi. Bilektegi bulshyq etteri oınap turǵanymen, qap kótere almaı san soǵyp qalǵandardy da kórdik. Suńǵaq boı, keń ıyq bolǵanymen, beldesýde álsizdik tanytqandar da júrdi. Al myqtylyǵymen kózge túsken atletter kópshiliktiń qoshemetine bólenip jatty.
Ár bólimniń arasynda Qajymuqannyń balýandyǵyn nasıhattap júrgen Sergeı Syrýlnıkov temirden gúl jasap, taqtaıǵa shege qaǵyp, óz ónerin ortaǵa saldy. Balýan babamyz týraly derekti fılm de kórsetti. Sergeıdeı uldyń batyr babamyzdy nasıhattap júrgenine kópshilik kórermen shyn rızashylyǵyn bildirdi.
Sonymen Batyrs Battle saıysynda kúsh synasqan Maksım Osıpov, Aleksandr Nıkıtın, Roman Kaýnov, Evgenıı Epıfanov, Andreı Lıýtovskıı syndy balýandardyń ishinen basym túsken grek-rım kúresinen sport sheberi Salaýat Ahmetqalı boldy. Salaýat aýyr qapty da kóterdi, temirdi de ıdi. Bóreneni tipti buıym qurly kórgen joq. Uıymdastyrýshy Sergeı Syrýlnıkovtiń aıtýynsha, Batyrs Battle saıysynyń núktesi tamyz aıynda Nur-Sultan qalasynda qoıylady.
Shyǵys Qazaqstan oblysy
