Kórmege kelýshiler bas qalamyzdyń qalyptasýy men damýyn kórsetetin fotosýretter men muraǵat qujattaryn kóre alady.
Uıymdastyrýshylardyń aıtýynsha, kórme barlyq qala turǵyny men qonaǵyna elimizdiń jańa astanasyn qurý dáýirine qyzyqty saıahat jasaıdy. Qyzyǵy sol, erekshe ǵımarattardyń irgesi qalana bastaǵan sátten bastap, búgingi kúnge deıingi keremet sátteri beınelengen. Sýretterde «Báıterek» monýmenti, Memleket basshysynyń Aqordadaǵy rezıdensııasy, Beıbitshilik jáne Kelisim saraıy, «Nazarbaev ortalyǵy», «Han Shatyr» saýda-oıyn-saýyq kesheni jáne basqa da kóptegen sáýletti keshen berilgen. Jańa astananyń negizin qalaýshy hám bas sáýletshisi – Elbasy Nursultan Nazarbaevtyń qyzmetine erekshe nazar aýdarylady.
Eksponattarda elordanyń ónerkásiptik damýy da kórinis tapty. Máselen, fotosýretterdiń birinde Nursultan Nazarbaev ındýstrıaldy parktiń 2007 jylǵy jobalarymen tanysady.
Jalpy, ekspozısııada 100-den astam fotosýret pen mátindik materıal bar. Olar elorda arhıvinen jáne Prezıdent arhıvinen súzip alyndy.
Mańyzdy tarıhı qujattardyń qatarynda Memleket basshysynyń 1997 jyly 20 qazandaǵy Aqmola qalasyn Qazaqstan Respýblıkasynyń astanasy dep jarııalaý týraly Jarlyǵy men basqa da jarlyqtary bar.
Pandemııaǵa baılanysty sońǵy oqıǵalar da ekspozısııada kórinis tapty. El Prezıdent Qasym-Jomart Toqaevtyń «Nur-Sultan» modýldik ınfeksııalyq aýrýhanasyna barǵan sýreti de kózge ottaı basylady. Sondaı-aq Memleket basshysynyń qatysýymen koronavırýspen kúreske úles qosqan medısına qyzmetkerlerine arnalǵan «Altyn júrek» memorıalynyń ashylýyn beıneleıtin fotosýret te berilgen.
Bul fotolardyń tarıhı qundy estelikter esebinde mańyzdy. Elimizdiń bas qalasynyń dańqty tarıhy jalǵasýda.
