Jol-kólik oqıǵasy búgin, 19 shildede Qorqyt ata áýejaıyna baratyn tasjol boıyndaǵy «Shirkeıli» kanalynyń tusynda oryn aldy. «Toyota Camry» jáne «Daewoo Nexia» jeńil avtokólikteri soqtyǵysyp, «Toyota Camry» avtokóligi sý kanalyna túsip ketken. «Daewoo Nexia» avtokóliginiń júrgizýshisi emhanaǵa jetkizildi.
«Atalǵan fakti boıynsha QR Qylmystyq kodeksiniń 345-babynyń 4-bóligimen sotqa deıingi tergep-tekserý amaldary júrgizilýde. Onda kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy, abaısyzda eki nemese odan da kóp adamnyń ólimine ákep soqqan is-áreket jaǵdaıy kórsetilgen. Qazirgi ýaqytta oryn alǵan jol-kólik oqıǵasynyń sebep-saldary anyqtalýda», dep málimdedi Qyzylorda oblystyq polısııa departamentiniń baspasóz qyzmeti.
Áleýmettik jelilerde sýǵa qulap ketken kóliktiń ishinde eki adamnyń bolǵany aıtylýda.
