‒ Shveısarııadaǵy týrnırden keıin birden Amsterdam arqyly Olımpıada astanasy Tokıoǵa eki kún buryn ushyp keldim. Áýejaıdaǵy jeti saǵattan asa ýaqyt boıy tekseris kádimgideı sharshatady eken.
‒ Osydan birneshe jyl buryn Tokıoda ótken ITF jarysynda jeńimpaz atanǵan edińiz. Japonııa sizge jeńis alyp keletin memleket dep aıta alasyz ba?
‒ Solaı desem de bolady. Tokıonyń atmosferasy unaıdy. Sondyqtan Olımpıadada jaqsy nátıje kórsetemin dep oılaımyn.
‒ Olımpıada joldamasyn alǵanyńyz týraly jańalyqty qalaı qabyldadyńyz?
‒ Alǵashqyda reıtıng boıynsha Olımpıadaǵa bara almaıtynymdy bilgenimde kóńil-kúıimniń túskeni ras. Biraq indetke baılanysty kóptegen tennısshi Olımpıadaǵa barýdan bas tartyp jatqanyn estigende múmkindigim bar ekenin bildim. Al jaǵymdy jańalyqty estigende qatty qýandym. Shveısarııadaǵy jarysta aıaǵymnan kishigirim jaraqat alyp qaldym. Degenmen, jarysqa deıin jaraqatym jazylady dep oılaımyn.
‒ Olımpıada qalashyǵyndaǵy sportshylardyń jaǵdaıy qalaı?
‒ Karantınge baılanysty kóp shekteý bolǵanyna qaramastan, biz buǵan úırenip qaldyq. Olımpıada qalashyǵynda bári keremet. Taǵamy jaqsy, jattyǵý zaldary yńǵaıly. Tek aýa raıy ystyq demeseńiz.
‒ Olımpıadaǵa bári júlde úshin keletini anyq. Kimdi favorıt, kimdi basty qarsylas sanaısyz? Jalpy, daıyndyǵyńyz qalaı?
‒ Árbir sportshynyń júlde alýǵa múmkindigi bar. Sondyqtan kimniń favorıt ekenin aıta almaımyn. Meniń de daıyndyǵym jaqsy, júlde alý úshin barymdy salamyn. Qazaqstan erler quramasy qorjynǵa júlde salady degen senimim bar. Ásirese, juptasyp synǵa túsýshiler sensasııa jasap, tarıhı jetistikke jetedi dep oılaımyn.
Aıta keteıik, jekeleı synda Olımpıadada alty tennısshi júlde úshin talasady. Olar ‒ Zarına Dııas, Iýlııa Pýtınseva, Elena Rybakına, Iаroslava Shvedova, Mıhaıl Kýkýshkın jáne Aleksandr Býblık. Al juptyq synda Andreı Golýbev pen Aleksandr Býblık baq synaıdy.
Almas MANAP,
Egemen Qazaqstan
Tokıodan (Japonııa)
