‒ Álemdik reıtıngte úzdik tórttikte turǵan boksshylardy jartylaı fınalǵa deıin kezdespeıtindeı etip jerebe tartyldy. Bizdiń quramadan 81 kıloda Bekzat Nurdáýletov, 91 kıloda Vasılıı Levıt jáne asa aýyr salmaqtaǵy Qamshybek Qońqabaevtar úzdikter qatarynda bolǵandyqtan olar Olımpıadada negizgi qarsylastarymen jartylaı fınalǵa deıin kezdese almaıdy. Biraq myqty degen boksshylardyń barlyǵyna jerebe sátti boldy deı almaımyn. Sebebi, Vasılıı Levıt ıspanııanyń atynan shyǵatyn kýbalyq boksshymen kezdesedi. Al odan ári ótse, 81 kıloda Rıo Olımpıadasynyń chempıony atanǵan La Krýzben kezdesýi múmkin. Jalpy, Azııa chempıonatynan keıin Vasılııdiń kem-ketikterimen jumys istedik. Durys-burys daıyndalǵanyn rıng kórsetedi.
‒ Qońqabaev pen Jalolov arasyndaǵy sońǵy kezdesýler ózbek boksshysynyń paıdasyna sheshilip jatyr. Bul týraly ne aıtasyz?
‒ Árıne, bul suraq áli talaı qoıyla beredi. Qońqabaev pen Jalolov bir-birimen judyryqtasý úshin aldymen eki-úsh qarsylasty jeńip shyǵý kerek. Sodan keıin kóre jatarmyz. Eger de fınalda kezdesip jatsa, Qońqabaev ketken eseni qaıtarýǵa tyrysatyny sózsiz. Ol oǵan ábden daıyndaldy.
‒ Olımpıadalyq qalashyqtyń qyzmet kórsetý jaǵdaıy qalaı?
‒ Barlyǵy jaqsy. Biz kýrortqa kelgen joqpyz, saıysqa keldik. Sondyqtan barlyǵyna daıynbyz. Áleýmettik jelide shýlap aıtyp júrgen kartonnan jasalǵan kerýertter yńǵaıly. Sapasy da keremet.
‒ Tokıoǵa kelgennen keıin birden jattyǵý jasaýǵa múmkindik boldy ma?
‒ Biz birinshi kúnnen bastap jattyǵýdy bastap kettik. Alǵashqy jattyǵýdy kelgen kúni-aq ashyq alańda jasadyq. Ekinshi kúnnen bastap jattyǵýdy zalda ótkizip júrmiz.
‒ Aýa-raıyna, jergilikti ýaqytqa beıimdeldińizder me?
‒ Tokıoda ylǵal kóp. Ystyqtaý. Biraq biz jattyǵýdy keshke jasap jatyrmyz. Bizde eshqandaı problema joq. Jergilikti klımatqa da, aýa-raıyna da úırenip aldyq.
‒ О́zbekstan quramasynyń boksshylary Tokıoǵa erte kelgen eken. Al Qazaqstan boksshylary nege erte kelmedi?
‒ Biz Almatydaǵy «Aqbulaq» olımpıadalyq ortalyqta eki apta boıy karantındik talaptardy saqtaı otyryp, tyńǵylyqty jattyǵý jasadyq. Olımpıadaǵa qatysatyndarǵa ekinshi-úshinshi nómirli boksshylar kómektesti.
‒ Tokıoda quramanyń jospary qandaı?
‒ Árkimniń óz jospary bar. Biraq daıyndyqtyń nátıjesin rıng kórsetedi. Baq pen bap qatar kelse, barlyǵynyń da júlde alýyna múmkindigi bar.
‒ «Qazaqtyń salmaǵy» ‒ 69 kılodaǵy Abylaıhan Júsipov ózi qatysqan sońǵy týrnırlerde olja almaı júr. Muny nemen túsindiresiz?
‒ Abylaıhan sóz joq talantty boksshy. Biraq bul salmaqta Zamkovoı, Batýrov, Sotolongo syndy myqtylar bar. Olarmen teń dárejede judyryqtasý da ońaı emes. Osylardyń qaısysy myqty bolady, sol chempıon atanady.
‒ Ábilhan Amanqul kóbine jaraqat alyp jatady. Qazir jaǵdaıy qalaı?
‒ Ábilhan qazir babynda. Azııa chempıonatynda jaqsy judyryqtasyp shyqty. Tokıoda da jaraqat almaı bokstasyp shyqsa, Ábilhannan nátıje kútemiz.
‒ Bekzat ekinshi Bekzat bola ala ma?
‒ Suraǵyńyzdy túsindim. Bekzattyń jerebesi ońaı emes. Onyń aldaǵy qarsylasy Imam Hataev degen reseılik myqty boksshy. Túbi sondaı-aq daǵystandyq Ispanııanyń atynan shyǵatyn boksshy ol da ájepteýir qarsylyq kórsete alady. Sondyqtan Bekzatqa alǵashqy kezdesýde jeńiske jetý mańyzdy. Olımpıadada biz Bekzattan úmit kútemiz.
52 kg
Sáken Bıbosynov – Iаnkıel Rıvera (Pýerto Rıko)
57 kg
Serik Temirjanov – Roland Galos (Vengrııa)
63 kg
Zákir Safıýllın – Leodan Pezo (Perý)
69 kg
Abylaıhan Júsipov – qarsylasy keıin anyqtalady
75 kg
Ábilhan Amanqul – qarsylasy keıin anyqtalady
81 kg
Bekzad Nurdáýletov – qarsylasy keıin anyqtalajy
91 kg
Vasılıı Levıt – Emmanýel Reıes (Ispanııa)
+91 kg
Qamshybek Qońqabaev – Esrı Rez Mustafa (Egıpet)
+75 kg
Nadejda Rıabes – Tamara Tıbelt (Kanada)
Almas MANAP»,
«Egemen Qazaqstan»
Tokıodan (Japonııa)
