«Egemen Qazaqstan» gazetiniń taıaýdaǵy nómirinde (8 qańtar, 2013 j.) «Aına aına emes, halyq – aına» degen shaǵyn maqala jaryq kórdi. Shynynda, halyqtyń aına ekeni anyq. Bárin kórip-bilip otyr. Biraq oı túbindegi altyn jaýhary – eldiń jaıy, Elbasy aıtqan táýelsizdiktiń máńgiligi, jurttyń birligi, urpaqtyń keleshegi.
«Egemen Qazaqstan» gazetiniń taıaýdaǵy nómirinde (8 qańtar, 2013 j.) «Aına aına emes, halyq – aına» degen shaǵyn maqala jaryq kórdi. Shynynda, halyqtyń aına ekeni anyq. Bárin kórip-bilip otyr. Biraq oı túbindegi altyn jaýhary – eldiń jaıy, Elbasy aıtqan táýelsizdiktiń máńgiligi, jurttyń birligi, urpaqtyń keleshegi.
Osyndaı uly maqsattyń oryndalatynyna senip, jeńil jelpinýge boı aldyrmaı, oı-sanaǵa kir túsirmeı, tózimdilikpen qazynalyǵyn tanytyp keledi. Al bizdiń shendi sheneýnikter, ákim-qaralar, halyq qalaýlysy delinetin depýtattar, sol halyqtyń aına ekenin, bárin kórip-bilip otyrǵanyn esten shyǵaryp alyp, keıde sanańa syımaıtyn ýájder aıtatyny bar. Sonyń bir parasy – olardyń, ıaǵnı atqaminerlerdiń «kedeıligi». Sózderine sensek, deklarasııa ótkizgendegi aıtqandaryna uıysaq, suhbat bergendegi mysaldaryna qarasaq, «úıleri» joq, «kúıleri» kemshin. Alatyn aılyqtary shaılyǵyna jete bermeıdi-mys. Qyzyl kommýnıst depýtattyń biri ár aıdaǵy eńbekaqysynyń jarty mıllıon ekenin, kólikti nesıege alýǵa umtylyp júrgenin alǵa tartqany bar. Tipti, halyq eki tizgin, bir shylbyrdy qoldaryna ustatyp, qadir tutyp, qarap otyrǵan keıbir azamattar arzandatylǵan 20-30 myńnyń kostıým shalbaryn kıetinin «jarııa» etetinin qaıtersiń? Sonda olar osy sózderdi qaýym qabyldaıdy dep oılaı ma eken?
«Jurttyń kóz aldynda júrgender solaı jupyny ómir súrip jatsa, bylaıǵy eldiń hali qalaı? Bir úzim nanǵa zar bolyp júrgen joq pa? Tórt keregege qoly jetip, ul-qyzyn asyraýǵa shamasy bar ma?» demeske sharamyz joq. Sóıtesiń de, iri qalalardyń ishi-syrtyndaǵy saltanatty saraılar kimdiki eken, artynan Sultanmahmut Toraıǵyrovsha sóz saptap: «Bizderde mynandaı bar, mynandaı bar», dep baılyǵymyzdyń baryna táýba deımiz. Artynan osy baılyq barda «kedeı» sheneýnikterdiń jaǵdaıy onsha qurdymǵa kete qoımaıtynyn oısha túsinip, álgi saraılardy kóz aldymyzǵa elestetkende, taǵy da Sultanmahmuttyń: «Keseni qolyma alyp qaraı berdim, Ishinde naqaq kózden jas bar ma dep» keletin óleńi oıǵa oralady. Artynan atam qazaqtyń «joqtyń túbi joǵalady» degen sózi eske túsip, sol shirkinder, aına halyqtyń aldynda jalǵan aqtalmaı-aq, únsiz júre berse qaıter edi deısiń. Búgin olardyń dáýleti «kem» bolǵanmen, erteń mol ekeni aıdaı álem aldynda aqıqatqa aınalaryn kim joqqa shyǵara alady?
Súleımen NÚSIP.
