Indýstrııa jáne ınfraqurylymdyq damý mınıstri Beıbit Atamqulov pen RF О́nerkásip jáne saýda mınıstriniń orynbasary Oleg Bocharovtyń qatysýymen «Qazaqstandyq avıasııalyq ındýstrııa» JShS-niń (QAI) «Oral azamattyq avıasııa zaýyty» AQ enshiles kompanııasy «Baıkal-ınjınırıng» JShQ-ǵa qatysý úlesin satyp alýy týraly kelisimshartqa qol qoıyldy.
Qazaqstan tarapy bul jobaǵa 1 mlrd rýbl kóleminde ınvestısııa salyp, jobadaǵy mınorıtarlyq úleske ıe bolady jáne osy ushaqtardy óndirýge lısenzııa alady. Kelisim 2024 jyldan bastap QAI bazasynda «Baıkal» túrindegi ushaqtar óndirisin uıymdastyrýdy kózdeıdi. О́ndiristiń qýaty – jylyna 30-50 ushaq. Qazaqstandyq kásiporyn úshinshi elderge arnap eksporttyq nusqada «Baıkal» ushaqtaryn lısenzııalyq óndirý quqyǵyna ıe boldy.
Sondaı-aq Qazaqstannyń avıasııalyq ákimshiligi jáne Rosavıasııa arasynda ushý jaramdylyǵy boıynsha jumys kelisimine qol qoıyldy. Kelisim ushý jaramdylyǵy sertıfıkattaryn, úlgilik sertıfıkattardy jáne áýe tehnıkasynyń bólshekteri men jıyntyqtaýyshtaryn, onyń ishinde ushqyshsyz áýe júıelerin baǵalaýdy, synaýdy jáne tekserýdi qaıtalamaı paıdalanýǵa ruqsat berý tártibin ońaılatýǵa baǵyttalǵan. Kelisim ózgeristerdi, modıfıkasııalardy ózara maquldaýǵa, áýe tehnıkalaryn jáne onyń jınaqtaýyshtaryn jóndeýdi damytýǵa, sondaı-aq azamattyq áýe tehnıkasynyń úlgilik konstrýksııasyn maquldaýdyń (valıdasııalaýdyń) ońaılatylǵan tártibi úshin qolaıly jaǵdaılar jasaýdy kózdeıdi.
Buǵan qosa «Jýkovskıı atyndaǵy ınstıtýt» ǴZO-men ǵylymı-tehnıkalyq yntymaqtastyq týraly kelisim jasaldy. Professor N.E.Jýkovskıı atyndaǵy Ortalyq aerogıdrodınamıkalyq ınstıtýt (OAGI) qazaqstandyq «QAI» JShS-men kelisimge qol qoıdy.
Birlesken qyzmet baǵyttary ishinde «OAGI» FGÝP ǵylymı-synaq bazasyn paıdalana otyryp, zertteý jobalaryna, ushqyshsyz ushatyn apparattardy (UUA), ushý trenajerlaryn ázirleýge qatysý bar.
Kazakhstan Gharysh Sapary ulttyq kompanııasy Avıasııalyq ǵylym ortalyǵymen ǵarysh salasynda birlesken Qazaqstan-Reseı baǵdarlamalary týraly kelisim jasasty.
«Roskosmos» MK, «Rosoboroneksport» AQ, FSVTS, «Almaz-Anteı» áýe shabýylyna qarsy qorǵanys konserni» AAQ jáne «Reseı tikushaqtary» AQ basshylyǵymen ǵarysh salasyndaǵy jáne qorǵanys-ónerkásip keshenindegi yntymaqtastyq máseleleri boıynsha jumys kezdesýleri ótti.
Sonymen qatar mınıstr Beıbit Atamqulov Airbus tobynyń Shyǵys Eýropa, Kavkaz jáne Ortalyq Azııa elderindegi vıse-prezıdenti Jak Garrıgpen jáne Belarýs Respýblıkasynyń Memlekettik áskerı-ónerkásiptik komıtetiniń tóraǵasy Dmıtrıı Pantýspen kelissózder júrgizdi. Belarýstyq seriktester arnaıy maqsattaǵy ónimderdi óndirý boıynsha tehnologııalar transfertine qyzyǵýshylyq bildirdi.
Kezdesýlerdiń barlyq qatysýshysy Qazaqstan basshylyǵynyń ekijaqty qarym-qatynastar men ónerkásiptik kooperasııany damytýdaǵy zor eńbegin atap ótti.
