Aqtóbe oblysy 9 shildeden bastap koronavırýs ınfeksııasynyń taralýy boıynsha «qyzyl aımaqtyń» qatarynda tur. Pandemııa bastalǵaly óńirde KVI-men 14 142 adam aýyryp shyqty. Búginde qaýipti indetke shaldyqqan 2 490 naýqastyń 503-i stasıonarlyq, 1 987-i ambýlatýralyq rejimde em alyp jatyr.
Osy jyldyń basynan beri 294 júkti áıel koronavırýs ınfeksııasyn juqtyryp dárigerlik kómekke júgindi. Búginde provızorlyq ortalyqta 57 júkti kelinshek jatyr. Aıta ketý kerek, byltyr sábı kútip júrgen 15 kelinshek osy indettiń asqynýynan kóz jumǵan bolatyn.
«Qyzyl aımaqqa» engen kúnnen bastap, indetke shaldyqqandar sany artýy múmkin degen boljammen óńirde 24 ınfeksııalyq stasıonar ázirlendi.
«Dál qazirgi kezde 18 stasıonarda naýqastar em alyp jatsa, rezervte 6-ýy daıyn tur. Osy ınfeksııalyq stasıonarlarda daıyndalǵan 3 603 kereýettiń 401-i – reanımasııalyq kereýetter. 18 shildede bir táýlikte KVI-men aýyrǵan 159 jaǵdaı, al 21 shildede 192 jaǵdaı tirkeldi (onyń ishinde aýrý sımptomdary bar – 134)», dedi oblystyq densaýlyq saqtaý basqarmasynyń basshysy Rústem Isaev.
Sondaı-aq sońǵy kúnniń málimetine qaraǵanda, Shalqar, Temir, Muǵaljar aýdandarynda koronavırýs juqtyrǵandar sany aıtarlyqtaı kóbeıgen. Sonyń ishinde 18 jasqa tolmaǵan 25 bala osy juqpaly indettiń quryǵyna ilinip, aýrýhanaǵa jatqyzyldy.
Aıta ketý kerek, osy kúnge deıin Aqtóbe oblysynyń 206 myń 280 turǵyny koronavırýsqa qarsy ekpe aldy. Mınıstr Aqtóbe oblysynda rezervte turǵan kereýetterdi shuǵyl túrde daıyndap, keńes berý-dıagnostıkalyq toptyń jumysyn jasaqtap, alǵashqy járdem berý ortalyqtarynda ahýaldyq ortalyqtar ashýdy tapsyrdy.
Aqtóbe oblysy
