Búgin Qaraǵandy oblysynyń qylmystyq ister jónindegi mamandandyrylǵan aýdanaralyq sotymen jas qyz balaǵa qatysty kúsh qoldanyp, onyń dármensiz kúıin paıdalanyp birneshe ret zorlaý faktisi boıynsha QK-tiń 120-b. 4-b saı úkim jarııalandy.
Sottalýshynyń kinási jábirlenýshiniń, onyń zańdy ókiliniń, kýálardyń aıǵaqtarymen, saraptama qorytyndysy jáne basqa materıaldarmen dáleldendi.
Esterińizge sala keteıik, 2020 jyldyń qańtar aıynda aýyl meshitiniń moldasy qyzmetin atqaryp júrip, sol aýyldyń bir otbasyna úı men mal sharýashylyǵyna kómektesip júrgen. Bir kúni úıde úlkenderdiń joqtyǵyn paıdalanyp, din qyzmetkeri sol úıdiń 14 jasar qyz balasyn zorlaǵan. Keıin anyqtalǵandaı, ondaı áreketterdi molda birneshe ret qaıtalaǵan. Saldarynan qyz bala júkti bolyp qalǵan.
Prokýror sottalǵandy Qylmystyq kodekstiń 120-b. 4-b. boıynsha kináli dep tanyp 20 jylǵa bas bostandyǵynan aıyrý jazasyn taǵaıyndaýdy surady.
Jábirlenýshiniń zańdy ókili prokýrormen kelisti. Alaıda qorǵaýshy tarap sottalǵan kinásin jartylaı moıyndaǵandyqtan, ony katań jazalamaýdy surady.
Nátıjesinde, sottyń úkimimen aıyptalýshy jas balany, onyń dármensiz kúıin paıdalanyp birneshe ret zorlaǵany úshin kináli dep tanylyp (QK 120-b. 4-b.), oǵan pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarýǵa ómir boıyna tyıym sala otyryp, 20 jylǵa bas bostandyǵynan aıyrý jáne jazany óteý qylmystyq-atqarý júıesiniń qaýipsizdigi barynsha joǵary mekemesinde taǵaıyndaldy.
«Is boıynsha qylmystyq jaýapkershilik pen jazany jeńildetetin jáne aýyrlatatyn mán-jaı anyqtalmaǵan. Qylmystyq zańda osyndaı qylmys úshin 20 jylǵa bas bostandyǵynan aıyrý jazasy qarastyrylǵan. Jazany taǵaıyndaý kezinde sottalǵannyń bala kezinen úshinshi toptaǵy múgedek ekeni, buryn sotty bolmaǵany jáne kinásin jartylaı moıyndaǵany, sonymen qatar jábirlenýshiniń pikiri eskerildi», dep málimdedi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
