Shildeniń segizinde «Prıgorodnyı» orman sharýashylyǵynda tutanǵan alapat órtti aýyzdyqtaýǵa oblystyq tótenshe jaǵdaı qyzmetiniń 30-dan astam arnaıy tehnıkasy, 100 shaqty órt sóndirýshi men 80 polısııa qyzmetkeri jabylǵan. Alaıda órtpen birge kóterilgen kúshti jeldiń ekpinimen órshigen qyzyl jalyndy toıtarý múmkin emes edi. Sharpýy shaqyrymdyq jerdi qaryǵan tilsiz dushpan az ýaqyt ishinde jolyndaǵynyń bárin jalmaı jyljyp, Novoselov, Osınov jáne Abaı eldi mekenderine qaýip tóndire bastaǵan.
Jaǵdaı ýshyǵyp bara jatqan sátte órt sóndirýshilerge bolysýǵa jergilikti sharýashylyqtardyń soqa tirkegen traktorlary men greıderleri, kúrek-ketpen ustaǵan jumysshylary kelip jetken. «Jumyla kótergen júk jeńil», osylaısha, der kezinde kelgen qosymsha kúshtiń kómegimen dúleı órttiń beti qaıtyp, 300 gektardan astam orman alqaby aman qaldy.
Avtogreıder júrgizýshisi Abaı Úsenovtiń aıtýynsha, órt kezinde aınalany túgeldeı tútin basyp, aldaǵy jol kórinbeı qalǵan. Tek greıder kelip jol salǵan soń ǵana órt sóndirýshiler orman ishine ótip, órt oshaǵy men onyń ári qaraı taralý baǵytyn anyqtaı alǵan.
–Árbir eldi mekende erikti órt sóndirýshiler jasaǵy bolý kerek. Qazir Tótenshe jaǵdaılar departamentimen birlesip, bul máseleni sheshýdiń joldaryn qarastyryp jatyrmyz. Mundaı jasaqtardy arnaıy kıimdermen jáne órt sóndirý quraldarymen qamtamasyz etý jaǵyn da oılastyryp qoıdyq. Olar tótenshe jaǵdaı týyndaı qalǵan jaǵdaıda jedel qımyldap, tez arada negizgi kúshke kómekke kelýge tıis, – dedi Polısııa departamentiniń bastyǵy Beket Aımaǵambetov.
Oblystyq Tótenshe jaǵdaı departamentiniń basshysy Birjan Kárimov te marapat ıeleriniń qolyn alyp, qystalań sátte tabıǵat baılyǵyn qorǵap qalý úshin qolyndaǵy tehnıkasy men boıyndaǵy bar kúsh-jigerin aıamaǵan ójet turǵyndarǵa shynaıy razylyǵyn bildirip, alǵys aıtty.
Qostanaı oblysy
