Batys Qazaqstan oblysynda jergilikti kásipkerdiń otbasyna qaraqshylyq shabýyl jasaldy. 61 jastaǵy Vıtalıı Kýrkýla aıýandyqpen sol jerde óltirilse, onyń 59 jastaǵy áıeli aýyr jaralanyp, aýrýhanaǵa tústi. Bul týraly «KTK» telearnasy habarlady.
Mıyna qatty zaqym kelgen kelinshekke 3 márte ota jasalypty. Aıta keterligi, erli-zaıypty Kýrkýlalar óńirge belgili jeke sharýa qojalyǵynyń ıeleri ǵana emes, sondaı-aq oblystyq máslıhattyń depýtattary. Qazir oryn alǵan oqıǵamen Astanadan arnaıy qurylǵan tergeý toby aınalysýda.
О́ńirge tanymal kásipkerdiń otbasyna jasalǵan bul qaraqshylyq shabýyl 12 qańtarda keshkisin bolǵan. Marqumnyń aǵasy Evgenıı Kýrkýla baýrynyń eshkimmen óshtespegenin aıtady. « Aǵamnyń basynan eki ret oq atyp, qolymen joǵaryǵa ilip qoıypty. Soǵan qaraǵanda, ony qınaǵan bolýy kerek. Mundaı aıýandyqty kim jasady eken?», - deıdi ol kenetten bolǵan qazaǵa qabyrǵasy qaıysyp.
Qylmyskerlerdiń kózdegeni kásipker Vıtalıı Kýrkýlanyń ózi bolsa kerek, ony dál basynan eki márte oq atqan. Al kelinshegin basynan uryp, taldyrǵan. Keıin esin jıǵan Valentına «103» qyzmetinen kómek suraǵan. Biraq, aýrýhanaǵa jetkeninde esinen tanady. «Naýqasqa qoıǵan dıagnozymyz – bas súıeginiń synýy. Qazir jaǵdaıy óte nashar. Apparatpen demalyp jatyr», - dedi aýdandyq aýrýhana basshysy Nadııa Ahmetova.
Aldyn ala júrgizilgen boljamǵa júginsek, kúdiktiler úıdegi qundy zattar men kózge kóriner jerde turǵan 500 myń rýbldi almaǵan. Osyǵan qaraǵanda aıypkerler urlyq jasaýdy maqsat tutpaǵan sekildi.
«24 kz» telearnasynda aıtylǵandaı, V. Karkýla oblystaǵy eń iri sharýa qojalyqtarynyń birine basshylyq jasaǵan eken. 14 myń gektar jerge astyq ónimin salǵan kásipkerdiń budan bólek myń bastaı iri qara maly men dúkender jelisi bar. Sharýashylyqta 350 adam eńbek etedi. Oblystyq ishki ister departamentiniń basshylyǵy óńir jurtshylyǵyn osy qylmystyq isti ashýǵa járdemdesýge shaqyrýda. Sonymen qatar tergeýge qatysty qandaı da bir málimet bergender úshin syıaqy taǵaıyndalatynyn málimdedi.
Búginde jekelegen buqaralyq aqparat quraldary Oral qalasyndaǵy belgili kásipkerdi bas arazdyǵy bolǵan tulǵa óltirtýi múmkin degen aqparat taratyp úlgerdi. Degenmen, tergeý amaldary aıaqtalǵansha, naqty qorytyndyǵa kelý erterek. Sondyqtan bul is tóńiregindegi aqıqatty keıin habarlaıtyn bolamyz.
Baqytbek Keneshuly.
Derekkóz: «KTK», «24 kz» telearnalary.
Foto: «KTK» telearnasy.
