Mysyrda jańa konstıtýsııa jobasy boıynsha daýys berý kezinde bir adam qaza boldy. Bul týraly ITAR-TASS habarlady.
Polısııanyń aqpary boıynsha, Kaırdiń ońtústigindegi Benı-Sýeıf provınsııasyndaǵy qaqtyǵys kezinde tıym salynǵan «Musylman baýyrlar» assosıasııasynyń aktıvısti qaza bolǵan. 25 jasar jigittiń keýdesine oq tıgeni belgili boldy.
Benı-Sýeıf provınsııasyndaǵy saılaý ýchaskesi mańynda ereýilshiler men tártip saqshylary arasynda qaqtyǵys oryn alǵan. Eldiń túrli qalalarynda ıslamıster jańa konstıtýsııa jónindegi referendýmǵa qarsy narazylyq aksııasyna shyqty. Qaýipsizdik kúshteri saılaýshylardy qorǵaý úshin, qarý men kóz jasaýratatyn gaz qoldaný arqyly ereýilshilerdi yǵystyryp tastamaqshy bolǵan.
Sonymen qatar, búgin Mınýfııa provınsııasyndaǵy saılaý ýchaskesi mańynda bes jarylǵysh zat zalalsyzdandyryldy. Al Kaır soty mańyna jasyrylǵan bomba jarylyp úlgergen. Onyń saldary ázirge belgisiz bolyp otyr.
Aıdar О́risbaev.
Derekkóz: Itar-tass.com
Foto: Itar-tass.com
