Buǵan deıin Ulttyq kásipkerler palatasy men Sıfrlyq damý mınıstrligi birlesip, Ashyq qosymshasyn InfoKazakhstan.kz saıtynda tirkeý rásimin jeńildetken edi. О́tinimder ońaılatylǵan algorıtm boıynsha qabyldanady. Eger buryn ótinimdi óńdeýge 7 kúnge deıin ýaqyt ketse, búginde júıe avtomattandyrylǵan jáne QR-kodty alýǵa eki saǵattan artyq ýaqyt ketpeıdi. Ári bul jumystardyń bári tegin.
Keshe óńirlik kásipkerler palatasynyń mamandary qaraǵandylyq kásipkerlerge kómektesti. «Qalanyń úlken bazarlarynyń birinde 77 jalǵa alýshy ótinim berdi, olardyń 22-si QR-kod alǵan. Qaraǵandy oblysyndaǵy kómek kórsetý pýnkteri búginde óńirdiń 18 aýdanynda jáne iri qalalarynda jumys isteıdi. Jalǵa alýshylar óte belsendi, barlyǵy qosylǵysy keledi. Qazirdiń ózinde 100-ge jýyq ótinim kelip tústi», – dedi bazar ákimshiliginiń ókili Irına Mıshanova.
QR-kodty alýǵa ótinim bergen kásipkerlerdiń biri Lıdııa Chernyshova «Samal» bazarynda sómke men baskıim satady. Ol buǵan deıin ótinim bergisi kelgen, biraq ózdiginen jasaı almapty. Lıdııa Qaraǵandy oblysy Kásipkerler palatasynyń kómek kórsetý pýnktin ashqany jaqsy múmkindik ekenin aıtyp otyr.
Al Almatyda apta basynan beri Ashyq jobasyna qosylý úshin 2 myń jańa ótinim kelip túsken. Osyǵan baılanysty Almaty qalasynyń Kásipkerler palatasynda da bıznes sýbektilerine kómek kórsetý pýnkti ashyldy.
«Eger maýsymnyń basyndaǵy jaǵdaı boıynsha Almaty qalasynda barlyǵy 1 700 qatysýshy bolsa, búgingi kúni olardyń sany shamamen 3 000 obektini quraıdy» delingen Palatanyń bergen aqparatynda.
Sońǵy statıstıkaǵa súıensek, Qazaqstan boıynsha búginde 21,9 myń bıznes sýbektisi Ashyq jobasyna qosylǵan. Eger kásipkerler tarapynan Ashyq jobasyna qosylýǵa qatysty suraq týyndasa, О́ńirlik kásipkerler palatasyna nemese bıznes nysany ornalasqan mekenjaı boıynsha О́KP fılıaldaryna habarlasyp, aqparat alǵan jón. Al kómek kórsetý pýnkteriniń mekenjaıyn bilý úshin «1432» biryńǵaı nómirine habarlasýǵa bolady.
