Aýyl sharýashylyǵy mınıstriniń mindetin atqarýshy Erbol Qarashókeev oblysqa jasaǵan saparynda tótenshe jaǵdaı jarııalanǵan Aral aýdanyndaǵy Bógen, Amanótkel aýyldyq okrýgteri turǵyndarymen, sharýashylyq basshylarymen kezdesip, aımaqta mal azyǵyn daıyndaý máselesine qanyqty.
Mınıstr mindetin atqarýshy jurtpen júzdesýde memleket tarapynan kórsetilip jatqan kómekterge toqtaldy, mal azyǵymen qamtamasyz etý máselelerin sheshýdi jyldam úılestirý úshin mınıstrlik janynan respýblıkalyq jedel shtab qurylǵanyn aıta kelip, Úkimet deńgeıinde iske asyrylatyn sharalardy atady.
– Úkimet rezervinen Qyzylorda oblysyna zańǵa sáıkes belgilengen tártippen jetkiziletin mal azyǵynyń qunyn arzandatý úshin sýbsıdııa negizinde 1,7 mlrd teńge bólindi. Endi osy qarajat sharýa qojalyqtaryna tamyz aıynyń ishinde kezeń-kezeńimen jetkizilýi tıis. Odan bólek, bıyl fermerlerdiń jemshóp daıyndaýyna qosymsha arzandatylǵan janar-jaǵarmaı bólinedi. Alda oblystarǵa suratylǵan lımıtteri boıynsha jetkiziledi. Qyzylorda oblysyna 3,8 myń tonna lımıt bólindi, – dedi E.Qarashókeev.
Mınıstrlik tarapynan jaqynda mal sharýashylyǵyn sýbsıdııalaý erejesine engizilgen ózgeristerge sáıkes oblysta byltyr mal azyǵyna sýbsıdııa ala almaı qalǵan sharýa qojalyqtarynyń rezervtegi ótinimderi qanaǵattandyrylatyn boldy. Bul maqsatqa oblys bıýdjetinen 390 mln teńge qarajat ta bólingen. Endi aýyl sharýashylyǵy basqarmasy tez arada sheshim qabyldaýy qajet. «Qazaqstan temir joly» UQ» AQ kompanııasy basqa óńirlerden mal azyǵyn tasymaldaýǵa jeńildik beretin boldy.
Mınıstrdiń mindetin atqarýshy barǵan Bógen aýylynyń turǵyndary buryn-sońdy mundaı qýańshylyq bolmaǵanyn aıtady. Qazir osy aýyl men irgedegi Amanótkelge shóp pen B.О́temuratov qorynan bólingen qarjyǵa alynǵan jem jetkizilýde.
– Darııadan sý azaıǵandyqtan aınaladaǵy kólder tartylyp, onsyz da qıyndyq tartyp otyr edik. Qysta da qar túspeı, kóktemde shyqqan kók kóp uzamaı kúıip ketti. Qoǵa men adyraspanǵa aýyz salǵannan keıin-aq qazirgi maldyń kúıin bile berińiz. Kóktemde sıyr men jylqy uıyqqa batyp ólgen. Qazir ishinara usaq mal ólip jatyr. Jylda satyp alyp júrgen jemshóbimiz ǵoı. Bıyl sony tegin ber demeımiz. Tek qýańshylyqqa baılanysty baǵasy qymbat bolyp tur. Sony turaqtandyrý úshin jasalyp jatqan memleket qoldaýyna rızamyz, – deıdi aýyl turǵyny Esqara Edigeev.
Turǵyndar aýyl mańyndaǵy jaıylymnyń tarylyp bara jatqanyn aıtady. Qýańshylyqtyń belgisi baıqalǵannan maldy aman alyp qalý úshin tólin sata bastaǵan. Qazir ol da toqtap tur.
Bıyl Amanótkel aýyldyq okrýgindegi shabyndyq alqaptyń 95 paıyzy kúıip ketti. Biz barǵanda aýyl turǵyndaryna B.О́temuratov qorynan bólingen qarjyǵa alynǵan jem taratylyp jatyr eken. Alǵashqy lekte jaǵdaıy tómen 40 otbasyna 10 qaptan beriledi. Jalpy bul kómek aýyldyq okrýgtegi júzdegen shańyraqqa tıesili.
Kezdesýde E.Qarashókeev búginde Ekologııa mınıstrligimen tabıǵı rezervat jerlerine mal jaıý jáne shóp shabý jóninde kelisim jasalǵanyn aıtyp ótti. Sonymen qatar fermerlerge qoldaý kórsetý úshin mal sharýashylyǵyn damytýǵa alǵan nesıe tólemderin keıinge shegerý jóninde sharalar qabyldanady. Aýyl sharýashylyǵy mınıstrligi men «Báıterek» holdıngi birlesip qosymsha mal azyǵyn daıyndaıtyn tehnıka satyp alýdy qarjylandyrý jáne sýarmaly jerdi ıgerýge qajet qurylǵylardy satyp alýǵa nesıe berýdi de qarastyrady.
Sapar aıasynda mınıstrdiń mindetin atqarýshy «Aspaı» sý aǵytqysyndaǵy jóndeý jumystarymen tanysty. Aral aýdanynyń ákimi Serik Sermaǵanbetov munda jasalyp jatqan jumystardy tanystyryp ótti. Sý aǵytqysyn qalpyna keltirýge B. О́temuratov qorynan bólingen qarjynyń 4,5 mln teńgesi qaralyp, qurylys jumystary bastalyp ketken. Osydan keıin «Burmaqulaq» arnasy bógeledi. Oǵan oblystyq bıýdjetten 71 mln teńge bólinip otyr. Bul – osy aımaqtaǵy kólder men jaıylymdyq, shabyndyq jerlerdi sýlandyrýdyń qamy.
Sapar aıasynda delegasııa Saryqudyq óńirindegi «Yqylas» sharýa qojalyǵyna baryp, Aral qalasyndaǵy birqatar nysan jumysymen tanysty. Jalaǵash, Syrdarııa, Shıeli jáne Jańaqorǵan aýdandaryn aralady.
Memlekettik qoldaýdan bólek Aral aýdanyndaǵy qınalǵan halyqqa kómek kórsetip jatqandar az emes. Belgili kásipker Bolat О́temuratovtyń qory bólgen qarjy aýdandaǵy myńnan astam az qamtylǵan otbasynyń malyna jem satyp alýǵa jumsalsa, osy topyraqtan shyqqan kásipker azamattar da elge qolushyn sozyp jatyr. Aqtóbe, Túrkistan oblystarynan bólek jaqynda ǵana Jambyl oblysyndaǵy aǵaıyndar araldyqtarǵa 400 tonna shóp jiberdi. Bul qýańshylyqtan qınalǵan jurttyń qamqorlyqsyz qalmaıtynyn kórsetedi.
Qyzylorda
