Brakonerliktiń jolyn kesý boıynsha reıdtik is-sharalar júrgizý barysynda «Ohotzooprom» RMK Qyzylorda oblysy boıynsha fılıalynyń ınspektorlary Jalaǵash aýdanynan Shardara aýdanynyń turǵynyn ustady. Tekserý kezinde ustalǵan adamnyń sómkesinen «Qyzyl kitapqa» engizilgen qaraquıryqtyń ushasy tabyldy», dep habarlady QR ekologııa, geologııa jáne tabıǵı resýrstar mınıstrliginiń baspasóz qyzmeti.
Kúdiktiler ustalǵan jerge jedel-tergeý toby shaqyryldy.
«Inspektorlar polısııa qyzmetkerlerin kútken kezde, oqıǵa ornyna Qyzylordanyń eki turǵyny kelip, ınspektorlardyń qyzmettik avtokólikteriniń biriniń dóńgelegine myltyqtan oq atqan. Nátıjesinde, ınspektorlarǵa qaýip tóndirgen brakonerlerdiń sybaılastary janýardyń ushasyn alyp qashty», dedi QR EGTRM baspasóz qyzmeti.
Polısııa ınspektorlary men quqyq qorǵaý organdarynyń qyzmetkerleri brakonerlerdi ustady.
Atalǵan fakti QR QK 337-babynyń 4-tarmaǵy «Zańsyz ań aýlaý» jáne 380-babynyń 2-tarmaǵy «Bılik ókiline qatysty kúsh qoldaný» boıynsha Jalaǵash aýdandyq polısııa bólimshesinde tirkelgen.
