«Búgingi kúni qalada 7 045 tósek-oryn bar. Jaqynda ǵana oryn sany 6 myń bolǵan. Sońǵy kúnderi aýrýdyń órshýine baılanysty qosymsha tósek oryndary daıyndaldy. Rezervtik tósekter Oqý-klınıkalyq ortalyǵy sııaqty oryndarda daıyndalǵan. Sonymen qatar Goncharnaıa kóshesindegi Ftızıopýlmonologııa ortalyǵynda qosymsha 100 oryn quryldy. Gýmanıtarlyq-pedagogıkalyq kolledjdiń ǵımarattarynda da 300 tósek-oryn daıyndaldy. Erteńnen bastap «HAK» medısınalyq ortalyǵynyń bazasynda 130 oryn ashylady. Taǵy basqa uıymdar da qosylýda», dedi ol О́ńirlik kommýnıkasııalar qyzmetindegi brıfıngide.
Onyń aıtýynsha, qalada 700 jansaqtaý orny daıyndalǵan, búgingi kúni olardyń 310-ynda naýqastar jatyr. Jansaqtaý oryndarynyń 44% bos emes. Buǵan deıin habarlanǵandaı, epıdemıologııalyq ahýal nasharlaǵan jaǵdaıda Almaty stasıonarlarynda oryn sany 10 myńǵa deıin arttyrylatyn bolady.
