Kórneki sýret: livejournal.com
Aqtóbe oblysynyń ákimi Ońdasyn Orazalın tarıh ǵylymdarynyń doktory, Shyǵys elderi sáýleti halyqaralyq akademııasynyń korrespondent-múshesi Serik Ájiǵalı, tarıh ǵylymdarynyń kandıdaty, Á.H.Marǵulan atyndaǵy arheologııa ınstıtýtynyń bas dırektory mindetin atqarýshy Talǵat Mamyrovpen kezdesti.
Ǵalymdar oblys ákimine Muǵaljar aýdany aýmaǵyndaǵy Jaǵabulaq qorymynan bir aı shamasynda tabylǵan biregeı olja – tastan jasalǵan qurban shalynatyn oryn men altynmen qaptalǵan kórnekti semserdi kórsetti.
Aıta keteıik, qorymnyń ózi burynǵy temir dáýirine tán. Munda sondaı-aq qola aınalar, altyn toǵa jáne t.b. ejelgi zattar tabyldy. Arheologııalyq eskertkishti zertteý jumystary áli de jalǵasýda.
Sonymen birge, Qarǵaly aýdanynda qola dáýiriniń qonys mekeni tabyldy. Sol aýmaqtan metal pesh tabylǵan. Bul qazirgi Aqtóbe oblysynyń aýmaǵyn qola dáýirinde mekendegen taıpalardyń metal óndirisimen aınalysqanyn dáleldeıdi.
Jýyrda óńirde Edige batyr men Isataı Taımanulynyń jerlengen ornyn izdeý jumystary bastaldy. Quramyna arhıtektor, etnograf, arheologtar men arabıster kirgen etnografııalyq ekspedısııany ataqty ǵalym, professor Serik Ájiǵalı basqardy.
