«Qoıý qyzyl» aımaqta ınfeksııalyq tósekterdiń tolý kórsetkishi 70 paıyzdan joǵary bolady. Nur-Sultanda kesheden beri ınfeksııalyq stasıonarlardyń júktemesi 69% qurap, qala qaıtadan «qyzyl aımaqqa» ótti. Bul týraly onlaın-brıfıngte qalanyń bas memlekettik sanıtarlyq dárigeri Sarhat Beısenova aıtty.
«Bıylǵy maýsymnyń ekinshi onkúndiginen bastap «Delta» shtamynyń taralýymen elordada epıdemıologııalyq jaǵdaı nasharlady jáne maýsym-shilde aılarynda jyl basynan bergi barlyq syrqattanýshylyqtyń 55% -y tirkeldi. Shilde aıynda aýrýshańdyq deńgeıi mamyr aıyndaǵy kórsetkishten - 2,4 ese, maýsym aıynda 2,3 ese asyp tústi. Esterińizge sala keteıin, koronavırýstyń jańa túri qysqa ınkýbasııalyq kezeńmen erekshelenedi jáne aýrýhanaǵa jatqyzý men ólim -jitimniń joǵary yqtımaldyǵy bar», dep atap ótti S.Beısenova.
Bas sanıtardyń aıtýynsha, eskertýler jáne jazalaý sharalarynyń qabyldanýyna qaramastan, turǵyndardyń bári birdeı qaýipsizdik sharalaryn tıisti deńgeıde saqtamaıdy. Keıbir mekemelerde sanıtarlyq normalar men karantın talaptary eskerilmeıdi, kásipkerlik obektileri esikterin jaýyp alyp jumys istep jatyr. Osy jyldyń 20 mamyrynan bastap monıtorıngtik toptar 7 myńnan astam nysandy tekserip, 251 karantın rejımin buzý faktisin anyqtaldy. Bul nysandardyń kópshiligi - qoǵamdyq tamaqtaný oryndary.
