Prokýror Dastan Kýperbaev kúdiktini bes jyl merzimge bas bostandyǵynan aıyrýdy surady.
Sýdıa Berik Sháripti qamaýdan bosatyp, aıyppul salýǵa sheshim qabyldady.
«Berik Shárip 287-bapta, 2-bólikte kózdelgen qylmystyq quqyq buzýshylyq jasaǵany úshin kináli dep tanylsyn jáne 1000 AEK - 2 mıllıon 778 myń teńge aıyppul taǵaıyndalsyn. Berik Shárip 361-bapta, 4-bólikte, 3-tarmaqta kózdelgen qylmystyq quqyq buzýshylyq jasaýda kinásiz dep tanylsyn jáne onyń is-áreketterinde qylmys quramy bolmaǵany úshin aqtalsyn. QK-niń 62-babyna, 3-bóligine, 4-tarmaǵyna sáıkes aıyppul túrindegi jaza merzimine 2020 jylǵy 12 tamyz ben 2021 jylǵy 4 tamyz aralyǵyndaǵy kezeńde aıyppul túrindegi jazany óteýdiń 4 AEK úshin kúzetpen ustaý ýaqytynyń bir kúni esebimen kúzetpen ustaý ýaqyty eseptelsin, Berik Shárip taǵaıyndalǵan jaza óteldi dep eseptelsin jáne ol sot otyrysy zalynda kúzetpen ustaýdan bosatylsyn. Kúzetpen ustaý túrindegi bultartpaý sharasy joıylsyn. Qylmystyq jaýapkershilikke tartýmen keltirilgen zııandy ótettirý quqyǵy aqtaldy dep tanylsyn», dep qaýly etti sýdıa.
Berik Shárip 11 aıdan astam ýaqyt qamaýda boldy. Keshe, 3 tamyzda ol sotta sońǵy sóz sóıledi, onda ol ózin kinásiz dep atady.
«Maǵan «dárigerlerge vırýs juqtyrdyń» degen aıyp taǵyldy. Biraq bul múmkin emes, óıtkeni meniń áriptesterim koronavırýstan qorǵaýdyń birinshi qatarynda. Búkil álemde dárigerler vırýsty pandemııanyń basynda da, qazir de juqtyryp keledi. Bul ınfeksııaǵa birde-bir el daıyn emes edi, onyń ishinde biz de barmyz», dedi ol.
«SK-Farmasııa» JShS-niń burynǵy basqarma tóraǵasy Berik Sháriptiń ustalǵany týraly 2020 jylǵy tamyzda belgili boldy.
