Máselen, Jambyl aýdanyna qarasty Qostóbe aýyly Taraz qalasynan on shaqty shaqyrym qashyqtyqta ǵana ornalasqan. Iаǵnı «Batys Eýropa – Batys Qytaı» halyqaralyq kúrejoldyń batys jaq betindegi shaǵyn aýyl. Kólqaınar aýyldyq okrýginiń quramyna Tastóbe, Kólqaınar, Jambyl, Eńbek aýyldarymen qatar, osy Qostóbe aýyly da kiredi. Al Qostóbe aýylynda búginde 79 aýla bar bolsa, sonda 425 halyq turady. Jergilikti jurtshylyq negizinen mal baǵý, saýda jasaý sııaqty qarapaıym kásip kózimen kúneltedi.
Jalpy, Qostóbe – Jambyl oblysyndaǵy máselesi kúrdeli aýyldardyń biri. Olaı deıtinimiz, oblys ortalyǵy Taraz qalasynan shyǵatyn shaıyndy sý Qostóbe aýylynyń mańyna qaraı aǵyp barady. Aýyl mańynda shaıyndy sý jınalatyn arnaıy oryn bar. Al kún ystyqta da, jel turǵan kezde de bul aýyldyń mańaıymen júrýdiń ózi qıyn. Qolqany qapqan kúlimsi ıis, jaǵymsyz áser birden bilinedi. Árıne, shaǵyn aýyldaǵy kúrdeli másele – bir bul ǵana emes. Máselen, aýyldaǵy ınternet máselesi talaı jyldan beri turǵyndar tarapynan kóterilip kele jatsa da, áli kúnge deıin oń sheshimi tabylmapty. Qazirgideı búkil tirligińniń bári ınternetke baılanyp turǵan ýaqytta, bul tipti qıyn.
Eń qıyny – ásirese balalar onlaın sabaq kezinde kópir jaǵalap ketken. Sebebi ınternet «Batys Eýropa – Batys Qytaı» kólik dáliziniń boıynan ǵana jaqsy ustaıdy eken. Sodan sabaq kezinde aýyldyń bar balasy bir-bir telefondy qushaqtap, sol kópirdi jaǵalap júrgeni. Al balalardyń ata-analary, jalpy, aýyl turǵyndary avtokólik ári de, beri de júıtkip jatqan úlken joldyń boıynda balalar birdeńege urynyp qalmasa dep janyn shúberekke túıip otyrady.
«Aýyldaǵy kúrdeli máseleniń biri – jaıylym jerdiń joqtyǵy. Esik aldyndaǵy azyn-aýlaq malyna qarap otyrǵan qarapaıym halyq úshin bul – kúrdeli másele. Odan keıin ınternettiń joqtyǵy da – úlken másele. Qalaǵa jaqyn ornalasqan aýyl bolsaq ta, bul másele áli sheshilmeı keledi», deıdi aýyl turǵyny Japar Bozymbekov.
Sondaı-aq aýyl turǵyny Ázimhan Jumabaev ta ınternet máselesiniń ózektiligin, onyń joqtyǵy muǵalimderdiń jumysyna da, balalardyń sabaǵyna da kedergi keltirip otyrǵanyn jetkizdi. Jalpy alǵanda, qostóbelik jurtshylyqtyń búgingi janaıqaıy osy ınternet máselesi bolyp otyr. Al mundaı kúrdeli máseleni sheshýge kelgende ákimder de álsizdik tanytyp otyr eken.
Túrli deńgeıdegi áýlıeatalyq ákimder esep bergende, aýyl túgil, sol aýyldyń árbir kóshesindegi máselege deıin sheshimin taýyp jatqanyn aıtady. Mundaı kórsetkishke kópshilik, árıne, alǵys bildiredi. Biraq shyndyǵynda olaı emes ekenin osyndaı máseleler kórsetip beredi. Qoǵamda áli de kóp máseleniń kúrdeli kúıinde qalyp kele jatqanyn osyndaı jaǵdaılardan kórýge bolady. Máselen, tıisti basshylar jyl saıyn óńir aýyldaryn ınternetpen qamtý maqsatynda jumystar júrgizilip kele jatqanyn aıtady. Degenmen oblys ortalyǵyna eń jaqyn degen aýyldyń ahýaly osyndaı bolyp turǵanda, shalǵaıdaǵy shaǵyn aýyldardyń jaıyn aıtpasa da bolady.
Qostóbe aýylynda tek ınternet qana emes, baılanystyń da nashar ekenin aýylǵa barǵanda kórdik. Uıaly telefon arqyly tildesý múmkin emes. Bul rette Kólqaınar aýyldyq okrýginiń ákimi Asylbek Qonarov turǵyndardyń uıymdastyrýymen qazirgi kezde ınternet máselesin sheshýdiń jolyn qarastyryp jatqanyn jetkizdi. Shynynda da, ınternet máselesi bıyl sheshilmese, jańa oqý jylynda kópshiliktiń taǵy da kópir jaǵalap ketý qaýpi bar. Internettiń zary ótken turǵyndar: «Artta qalǵan aýyl boldyq, bizge eshkim kóńil bólmeıdi», dep kúıinedi.
