Almaty oblysy bilim basqarmasynyń «Almaty oblystyq №1 balalar úı» KMM dırektory men qyzmetkerine qatysty sotqa deıingi tergeý aıaqtaldy.
Tergeý barysynda balalar úıiniń áleýmettik pedagogy Mustafına qyzmet babyn paıdalanyp, ózine senip tapsyrylǵan 67 mıllıon teńge somasyndaǵy aqshalaı járdemaqyny urlaǵany dáleldendi.
«Sottalǵan Mustafına balalar úıiniń jetekshisinen qamqorshynyń múddesin bildirýge senimhaty bola otyryp, tárbıelenýshilerge asyraýshysynan aırylýy jáne múgedektigi boıynsha járdemaqy resimdep, ekinshi deńgeıdegi bankterde olarǵa kartochkalyq shottar ashty. Tárbıelenýshilerdiń esep aıyrysý shottaryna tolyq qoljetimdilikke ıe bola otyryp, mobıldi bankıng arqyly balalar úıiniń tárbıelenýshileriniń esep aıyrysý shottarynan jeke kartochkalyq shotqa aqsha qarajatyn aýdarýdy júzege asyrdy. Sondaı-aq tárbıelenýshilerdiń ózderiniń bank kartalaryn paıdalana otyryp, bankomattardan keıbir qarajatty alyp tastady», dep habarlady QR QQA baspasóz qyzmeti.
Sottalýshy zańsyz ispen 2015 jyldyń jeltoqsanynan 2020 jyldyń tamyzyna deıin aınalysqan.
Balalar úıiniń dırektory Qondybaeva 2018 jyldyń kúzinde Mustafınanyń urlyq faktileri týraly bilip, ony ýákiletti organdardan jasyryp, tárbıelenýshileriniń shottaryna qol jetkizýin shektemedi.
Sottalýshylar óz kinásin moıyndady. Qazirgi ýaqytta 10 mıllıon teńgeden astam mólsherdegi zııannyń bir bóligi balalar úıi tárbıelenýshileriniń paıdasyna óteldi. Sot 52,4 mıllıon teńge kólemindegi qalǵan somany jábirlenýshilerge qalpyna keltirýdi mindettedi.
Sot úkimimen Mustafına 7 jyl bas bostandyǵynan aıyrý jáne pedagogıkalyq qyzmetpen aınalysý quqyǵynan 10 jyl merzimge aıyra otyryp, QR QK 189-baby (Asa iri mólsherde senip tapsyrylǵan bóten múlikti ıemdený nemese ysyrap etý) boıynsha kináli dep tanyldy.
Qondybaeva QR QK 371-baby (nemquraılylyq) boıynsha 2,7 mıllıon teńge somasyna aıyppul taǵaıyndaýmen jáne memlekettik qyzmette qyzmet atqarý quqyǵynan aıyrýmen kináli dep tanyldy.
