Ádilqazylar alqasy júlde qory – 1 mln teńgege baǵalanǵan Gran-Prıdi tamasha daýysty Aılýnǵa berýge biraýyzdan sheshim qabyldady. Birinshi oryndy Nur-Sultan qalasynan kelgen jas ónerpaz Ádel Kúnádilova men bolgarııalyq 15 jastaǵy jas ánshi Elızabet Saharıeva ıelendi. Olardyń árqaısysyna 500 myń teńgeden tabystaldy. Qazylar alqasy Aqtaýdan kelgen jas ónerpaz Armen Saakıan men reseılik Mılana Ponamarenkony ekinshi orynǵa laıyq dep tanyp, olardyń árqaısysyna 350 myń teńgeden júlde tabystady.
Úshinshi oryndy Nur-Sultan qalasynan kelgen jas vokalshy Kamıla Ǵazızqyzy, Eset Áljan jáne ázerbaıjandyq jas ánshi Iskander Gasanzade ıelendi. Osy sanattaǵy júlde qory – 250 myń teńgeden baǵalanǵan. Pandemııaǵa qaramastan, Aqtóbede ótetin halyqaralyq jas talanttar baıqaýyna qatysý úshin júrekteri lúpildep kelgen balalardyń eshbiri qur ketken joq. Qaladaǵy «О́ner ortalyǵy» sahnasynda án aıtyp, vokaldyq sheberlikterin kórsetkenderge júldeli oryndardan ózge birneshe yntalandyrý syılyqtary taǵaıyndalǵan bolatyn.
Festıvaldy uıymdastyrýǵa atsalysqan Dımash Qudaıbergenniń arnaıy syılyǵy Nur-Sultan qalasynan kelgen Ádel Kúnádilovaǵa tabystaldy. Ádel endi Dımash Qudaıbergenniń shetelde ótetin konsertteriniń birine qatysyp qana qoımaı, úlken sahnada Dımashpen birge án salmaqshy. Eń qurmetti syılyqqa ıe bolǵan 14 jastaǵy ónerpaz Ádel qýanyshyn jasyra almaı erekshe shattandy. Osy sahnada «Dımash» fan-klýbynyń atynan festıvalǵa qatysýǵa kelgen 11 ónerpazǵa 100 myń teńgeden aqshalaı syılyq tabystaldy. Olardyń arasynda Ekaterınbýrgten kelgen 14 jastaǵy Anna Glotova men qazaqstandyq Álınur Hamzın bar.
Baqytty Bala-2021 halyqaralyq festıvaliniń qorytyndy gala konsertine qatysyp, balǵyn jeńimpazdardy arnaıy quttyqtaǵan oblys ákimi Ońdasyn Orazalın bylaı dedi: «Qurmetti jas ónerpazdar! Qazaqta «alystan alty jasar bala kelse, alpystaǵy aqsaqal sálem beredi» degen jaqsy sóz bar. Byltyr pandemııa kesirinen ótkize almasaq ta, bıyl jaqsy dástúrdi qaıta jalǵastyrýǵa sheshim qabyldadyq. Bıylǵy balalar baıqaýy el Táýelsizdiginiń 30 jyldyǵyna arnalady. Ulan-ǵaıyr jerdiń ıesi, birneshe myńdaǵan jyl boıy dalamyzdyń mádenıetin saqtap qana qoımaı, álemge pash etip kelgen kóshpendilerdiń urpaǵy rýhanı baı muramyzdy aldaǵy ýaqytta da tanystyra beremiz. Shetelderden de osy balalar festıvaline qatysýǵa ynta bildirgender jyl saıyn artyp keledi. Baqytty Bala-2021 án merekesi jas talanttar ustahanasyna aınalyp keledi dep aıtýǵa tolyq negiz bar. Bul tamasha óner saıysy jas talanttardy ashyp keledi. Bolashaqta sizderdiń aralaryńyzdan álemdik tanymal festıvaldardyń bolashaq úzdikterin kóremiz dep úmittenemiz. Osy festıvaldy ótkizýge bastama kótergen «Dımash Alı» stýdııasy bolsa, jas talanttar báıgesin uıymdastyrýǵa barynsha atsalysyp júrgen Dımash Qudaıbergendi erekshe atap ótkim keledi. HH ǵasyrda qazaq mýzyka ónerin ǵylymı aınalymǵa túsirip, kásibı mýzyka salasyn jolǵa qoıǵan Ahmet Jubanov bolsa, HHI ǵasyrdaǵy qazaqtyń ánshilik áleýetin dúnıejúzine tanytqan – Dımash Qudaıbergen. Jan-jaqtan jınalǵan balalardyń dostyq mekenine aınalǵan bul jobanyń úzdikteri áli de kóbeıeri anyq. Barlyq qatysýshylardy shyn júrekten quttyqtaımyz!».
Festıval qorytyndysy boıynsha Mádenıet jáne sport mınıstrliginiń arnaýly syılyqtary atyraýlyq Ámına Qurbanova men qyzylordalyq Tımýr Tıanǵa tabystaldy. Osy nomınasııa boıynsha Ámına «Astana Opera» stýdııasynda án jazýǵa, Tımýr Tıan beınebaıan túsirý múmkindigine ıe boldy. Aqtóbelik jas ánshi Islam Qystaýbaev Nur-Sultan qalasyndaǵy daryndy balalarǵa arnalǵan «Shabyt» mektebine qabyldanatyn boldy. Ánshi prodıýser U.Joldasovtyń avtorlyq ánin endigi jerde halyqaralyq saıystarda Iskander Gasanzade oryndaıdy. Sondaı-aq Túrkistannan kelgen jas ónerpaz Meırambek Shalqarbaıǵa «Dımash Álı» prodıýserlik ortalyǵynyń saýndprodıýseri Erlan Bekchýrınniń arnaıy syılyǵy tabystaldy. «Slavıan bazary» festıvaliniń bas júlde ıegeri Rýhııa Baıdýkenovanyń 100 myń teńge kólemindegi aqshalaı syılyǵyn jáne «Halyqaralyq kókjıek» nomınasııasyn Gresııadan kelgen jas ónerpaz Sofııa Salvarıdý men ýkraınalyq Krıstına Dýshýtına aldy.
Festıvaldyń jabylý sátine arnalǵan gala-konsertte Áıgerim Tileýbek, Dımash Qudaıbergen, Erjan Maksım, Rýhııa Baıdúkenova, Qaraqat Bashanova óner kórsetti.
Aqtóbe oblysy
