Ýkraınada jıyn ótkizý týraly qabyldanǵan zań jańa narazylyq tolqynyn týdyrdy. Bul týraly Azattyq.org habarlady.
Endi oppozısııa jetekshileri úkimetti ózgertý týraly ǵana emes, qaıta prezıdenttik saılaý ótkizý týraly da talap qoıa bastady.
19 qańtarda jıyn ótkizýge qatysty Ýkraına prezıdenti bekitken zańǵa qarsy ondaǵan myń demonstrant Kıevtegi Táýelsizdik alańyna jınaldy. Onyń arty ereýilshiler men tártip saqshylary arasyndaǵy qaqtyǵysqa ulasty.
ITAR-TASS agenttiginiń aqpary boıynsha, Kıev ortalyǵyndaǵy «Dınamo» alańy mańynda demonstranttar men «Búrkit» arnaıy jasaǵynyń sarbazdary arasyndaǵy 16 saǵatqa sozylǵan qyzý urystyń saldarynan eki jaqtan 100-den asa adam jaraqat alǵan.
Ereýilshiler polısııa jasaqtarynyń qorshaýyndaǵy parlament ǵımaratyna qaraı ótpek bolǵan taǵy bir top tártip saqshylaryn taıaqtyń astyna alǵan. Quqyq qorǵaý organynyń ókilderi narazy topty gaz shashyp taratpaq boldy. Qaqtyǵys kezinde ereýilshiler ishki ister mınıstrliginiń tórt avtobýsy men eki júk kóligin órtep jibergen.
Ýkraına oppozısııasy jetekshileriniń biri Vıtalıı Klıchko jıyn ótkizý týraly jańa zańdy «zańsyz» jáne «konstıtýsııaǵa qarsy dep sıpattady.
«Biz óte mańyzdy sheshim qabyldaýǵa tıispiz. Birinshiden, 16 qańtarda «Aımaqtar» partııasynyń usynysy boıynsha parlament músheleri qabyldaǵan zańdardy jaramsyz jáne zańsyz dep tanımyz. Ekinshiden, merziminen buryn prezıdent saılaýyn ótkizý máselesin daýysqa salýymyz kerek. Úshinshiden, saılaý ashyq, ári ádil ótýi úshin Ortalyq saılaý komıssııasynyń múshelerin aýystyrý qajet» – dedi Vıtalıı Klıchko. Sondaı-aq ol demonstranttardy polısııanyń kúsh qoldanýyna túrtki bolatyndaı arandatý áreketterine barmaýǵa shaqyrdy.
Ýkraına oppozısııasy Vıktor Iаnýkovıchti «dıktatorlyq bılik júıesin ornatpaqshy» dep esepteıdi.
16 qańtarda Iаnýkovıch qol qoıǵan jańa zań resmı ruqsatsyz qoǵamdyq jerlerge shatyr tigýge, sahna qurýǵa jáne daýys zoraıtqysh qoıýǵa tyıym salady. Sonymen qatar, jańa zań boıynsha demonstranttar betterin búrkemeýi tıis. Osy jolǵy narazylyq sherýine shyqqan ereýilshiler zańdy ájýalap medısınalyq maska men qurylysshy kaskalaryn kıip shyqty. Bastaryna ydys-aıaq kıip shyqqandar da bolǵan.
Jańa zań boıynsha, «qoǵamdyq tártipti buzýshylarǵa» 15 jylǵa deıin túrme jazasy qarastyrylǵan eken. Bul zańnyń qabyldanýyna kedergi keltirý úshin jergilikti demonstranttar depýtattardy parlament ǵımaratyna ótkizbeýge tyrysyp, elektrondyq saılaý júıesiniń jumysyna kedergi keltirmek bolǵan.
Aıdar О́risbaev.
Derekkóz: Azattyq.org
Foto: Itar-tass.com
