Máselen, 320 myń turǵyny bar shahardy jylýmen qamtamasyz etý maqsatynda jańa jylý elektr ortalyǵy salynyp jatyr. Nysannyń qurylys barysymen Abaı oblysyna jumys saparymen barǵan «Samuryq-Qazyna» AQ basshysy Nurlan Jaqypov pen oblys ákimi Berik Ýálı tanysty.
Jobaǵa sáıkes Semeı qalasynyń sol jaǵalaýynda ornalasqan úshinshi jylý elektr ortalyǵynyń belgilengen elektr qýaty 405 MVt, jylý qýaty – 1000 Gkal/saǵ. bolmaqshy. Bul kórsetkishter qala qajettiligin tolyq ótep, óńirdiń energetıka júıesiniń turaqtylyǵyn arttyrýǵa septigin tıgizedi.
Sapar barysynda qor basshysy «Samuryq-Energo» kompanııasynyń basshylyǵymen, merdigerlermen kezdesip, jobany iske asyrý qarqynyn, jumystyń qazirgi jaı-kúıin talqylady. Ásirese qurylys merzimin saqtaý, qurylys barysyn tıimdi uıymdastyrý máselelerine erekshe nazar aýdaryldy.
Atalǵan nysandy 2029 jyly iske qosý josparlanǵan. Kezdesý qorytyndysynda jumystyń turalap qalýyna jol bermeı, jobany mejeli merzimde aıaqtaý qajettigi aıtyldy. Sonymen qatar qurylys qarqynyn jedeldetýge barlyq qajetti sharany qabyldaý kerektigi eskertildi.
Jańa jylý elektr ortalyǵynyń iske qosylýy óńirdegi ekologııalyq jaǵdaıǵa da oń áser etedi. Joba aıasynda «taza kómir» tehnologııalary men zamanaýı gaz tazartý júıelerin qoldaný kózdelgen. Bul qazirgi kómirmen jumys isteıtin energııa kózimen salystyrǵanda zııandy shyǵaryndyny aıtarlyqtaı azaıtady.
Sondaı-aq osy kúni Semeı qalasynyń Beıbitshilik aralyndaǵy orman alqabynda «Samuryq-Qazyna» qory Abaı oblysy ákimdigimen birlesip ekologııalyq aksııa ótkizdi. Is-shara Memleket basshysy Qasym-Jomart Toqaevtyń «Taza Qazaqstan» bastamasy aıasynda uıymdastyryldy.
Naýqan aıasynda jas kóshetter otyrǵyzyldy. Jalpy, keıingi eki jylda «Samuryq-Qazyna» toby el kóleminde 5,8 mln túp aǵash ekken. Qor ókilderiniń aıtýynsha, bul baǵyttaǵy jumys júıeli túrde jalǵasady.
«Bıyl «Samuryq-Qazyna» kompanııalary 5 mıllıonnan astam tal egýdi josparlap otyr. Bul – jaı ǵana aksııa emes, kúndelikti ómirlik fılosofııamyzdyń bir bóligi. «Taza Qazaqstan» – negizgi qundylyqtarymyzdyń biri», dedi qor basshysy Nurlan Jaqypov.
Ulttyq ál-aýqat qory óńirdiń áleýmettik ınfraqurylymyn damytýǵa da atsalysyp keledi. Osy oraıda «Samuryq-Qazyna» qoldaýymen Semeı qalasynda zamanaýı dene shynyqtyrý-saýyqtyrý kesheni salynbaqshy. Qor basshysy Nurlan Jaqypov pen oblys ákimi Berik Ýálı nysannyń irgetasyn qalaý rásimine qatysyp, qurylystyń bastalýyn bildiretin kapsýlany saldy. Jalpy aýdany shamamen 2 myń sharshy metr bolatyn eki qabatty keshende ártúrli sport túrine arnalǵan zaldar, 100 kórermenge arnalǵan trıbýna, jattyǵý zaly, ózge de qajetti bólimder qarastyrylǵan. Jobany iske asyrýǵa shamamen 1,6 mlrd teńge baǵyttalady.
Búginde «Samuryq-Qazyna» qorynyń qoldaýymen elimizde 19 iri sport nysany jumys isteıdi. Bul keshenderde 700 myńnan astam adam sportpen aınalysady. Bıyl dál osyndaı nysandar Aqtóbe, Arqalyq, Qonaev qalalarynda da salynady.
Jalpy, keıingi 8 jylda Abaı oblysynda qordyń qoldaýymen 19 áleýmettik joba júzege asyrylǵan. Olardyń ishinde balalarǵa arnalǵan 2 ońaltý ortalyǵy, ınklıýzııany qoldaý kabınetteri, zaǵıp jandarǵa arnalǵan arnaıy kitaphana, sport alańdary, ózge de nysandar bar.
«Semeıdegi jańa keshen bolashaq chempıondardy tárbıelep, óńirdegi buqaralyq sporttyń damýyna serpin beredi dep senemin», dedi Nurlan Jaqypov saltanatty rásimde.
«Samuryq-Qazyna» qorynyń bastamalary Abaı oblysynyń áleýmettik-ekonomıkalyq damýyna tyń serpin berip, turǵyndardyń ómir sapasyn arttyrýǵa baǵyttalǵan. Qor toby júıeli jumysty ári qaraı da jalǵastyryp, ózge óńirlerde de el ıgiligine arnalǵan jobalardyń sanyn arttyrýdy kózdep otyr.
Jansaıa QAPASQYZY
