Kollajdy jasaǵan Záýresh SMAǴUL, «EQ»
Mınıstrdiń aıtýynsha, adamı kapıtalǵa ınvestısııa jasaý – memlekettik saıasattyń basty basymdyqtarynyń biri. Bul baǵyt Qasym-Jomart Toqaev júrgizip otyrǵan reformalardyń negizin quraıdy. Búginde álem elderi bilim berý júıesin jańǵyrtyp, jańa modelder men sıfrlyq sheshimderdi engizip jatyr.
«Qazirgi tańda bilim berý salasy tek bilim berýmen shektelmeı, naqty daǵdylardy meńgergen, eńbek naryǵyna beıimdelgen mamandardy daıarlaýǵa baǵyttalýy tıis. Bul – sapaly jańa kezeńge kóshý», dedi Aıda Balaeva.
Osyǵan baılanysty talapkerlerdi irikteý júıesinde, ásirese pedagogıkalyq mamandyqtarǵa qabyldaý kezinde jańa tásilder engizilmek. Atap aıtqanda, testileýmen qatar arnaıy emtıhandardy qamtıtyn gıbrıdti baǵalaý formasy qoldanylady. Bul tásil talapkerlerdiń tek pándik bilimin ǵana emes, sonymen birge synı oılaý, taldaý jáne kommýnıkasııalyq daǵdylaryn baǵalaýǵa múmkindik beredi.
Sonymen qatar, kelesi jyldan bastap pedagogıkalyq baǵyttarǵa túsý kezinde UBT nátıjelerimen qatar aýyzsha emtıhandar da eskerilmek. Bul emtıhandarda talapkerlerdiń oqýǵa daıyndyǵy men kásibı beıimdiligine erekshe nazar aýdarylady.
Mınıstr sondaı-aq UBT-ny bir ret tapsyrý formatyna kóshirý usynylyp otyrǵanyn atap ótti. Onyń sózinshe, bul sheshim grant konkýrsyna qatysý kezinde ádil ári obektıvti baǵalaýdy qamtamasyz etýge baǵyttalǵan. Al talapkerlerdiń daıyndyq deńgeıin tekserý úshin synaq testileý júıesi saqtalady.
Budan bólek, joǵary oqý oryndaryna Foundation baǵdarlamalary arqyly shartty qabyldaý tájirıbesinen bas tartý josparlanyp otyr. Sebebi mundaı júıemen qabyldanǵan stýdentterdiń edáýir bóligi oqý barysynda qajetti shekti baldy jınaı almaıdy.
«UBT júıesin ózgertý – testileýden bas tartý emes. Bul – daryndy talapkerlerdi anyqtap, ádil irikteýge baǵyttalǵan mańyzdy qadam», dep qorytyndylady Aıda Balaeva.
Jalpy, usynylyp otyrǵan ózgerister bilim berý sapasyn arttyryp, eldiń uzaq merzimdi damýyna negiz bolady dep kútilip otyr.
