RF Úkimetiniń tóraǵasy Mıhaıl Mıshýstınniń Qazaqstanǵa sapary aıasynda QR Strategııalyq josparlaý jáne reformalar agenttigi, «Astana» halyqaralyq qarjy ortalyǵy ákimshiligimen jáne UTB platformasymen birlesip ınvestısııalyq klımatty jetildirý, ınstıtýsıonaldyq ortany damytý, sıfrlyq jáne tehnologııalyq damý, kásipkerlik pen memlekettik basqarý salasyndaǵy adamı potensıaldy arttyrýǵa baǵyttalǵan yntymaqtastyq týraly kelisimge qol qoıdy.
Qujatqa SBA bas dırektory Svetlana Chýpsheva, SJRA tóraǵasy Qaırat Kelimbetov, AHQOÁ basqarma tóraǵasy Ernur Rysmaǵambetov jáne UTB platformasynyń bas dırektory Dmıtrıı Peskov qol qoıdy.
Kelisimde kórsetilgen taraýlardy iske asyrý maqsatynda birlesken Strategııalyq bastamalar keńsesin ashý josparlanǵan. Onyń quramyna taraptardyń ókilderi kiredi. Ondaǵy maqsat birlesken damý jobalaryn qurý jáne keńeıtý bolmaq.
Qujat aıasynda SBA-nyń Reseı Federasııasy óńirleriniń ınvestısııalyq klımatynyń reıtıngin qurýdaǵy tájirıbesin eskere otyryp Qazaqstan óńirleriniń ınvestısııalyq tartymdylyǵy reıtıngi jasalady.
«Kelisimge qol qoıý biz úshin azamattardyń ómirin jaqsartýǵa baǵyttalǵan jobalar men bastamalardy birlese daıyndaý men ilgeriletýge úlken múmkindikter usynady. Eki eldiń bilim berý, tehnologııa, ınvestısııalyq klımat, týrızm men ekologııany damytý boıynsha birlesken bastamalardy sátti iske asyrý jalpy osy óńirdiń damýyna yqpal etpek», dedi SJRA tóraǵasy Qaırat Kelimbetov.
