«Qazaqstannyń 100 jańa esimi» jobasynyń jeńimpazy atanǵan bul jas jigit kenshiler áýletinen shyqqan. Qazirgi ýaqytta ol I. Kostenko atyndaǵy shahtada jerasty taý-ken jumysshysy bolyp eńbek etip júr. Danıel aýyr jumysta júrgenine qaramastan, sportpen turaqty túrde shuǵyldanýǵa da ýaqyt tabady.
Bes jasynan bastap sporttyq gımnastıkamen aınalysyp kele jatqan ol osy salada tolaıym tabystarǵa qol jetkizgen: halyqaralyq dárejedegi sport sheberi, elimizdiń birneshe dúrkin chempıony jáne halyqaralyq jarystardyń birneshe márte júldegeri.
Jalpy, Danıel men onyń seriktesi – elimizdegi sporttyq gımnastıka boıynsha erler arasyndaǵy eń úzdik juptyń biri. Osy jyldyń ózinde olar Bolgarııada ótken Álem kýbogy synynyń kezeńinde qola júldege qol jetkizgen.
«Sporttyq gımnastıka – óte ádemi jáne sonymen birge asa qıyn sport túriniń biri. Nege deseńiz, juptasyp óner kórsetetindikten ózińe ǵana emes, seriktesiń úshin de jaýap beresiń. Vadım ekeýimiz bir-birimizdi ymmen túsinemiz, osyndaı seriktes tapqanym jolymnyń bolǵany dep esepteımin», deıdi Danıel.
Sporttyq gımnastıkadan Qaraǵandy oblysynyń aǵa jattyqtyrýshysy Botagóz Baıbakýsheva Danıeldiń óte eńbekqor jáne shydamdy jas ekenin maqtanyshpen aıtady.
«Bizde sportshylardyń kóbi qıyndyqqa shydamaı, tastap ketip jatady. Al Danıel bolsa, óte tózimdi, aldyna qoıǵan maqsatyna jetpeı tynbaıtyn jigit. О́mirde de ol óte kóńildi júretin, ashyq-jarqyn adam. Qansha jerden sharshasa da, onysyn esh bildirmeı, óte sergek júredi», deıdi bapker.
Bıyl «Rýhanı jańǵyrý» baǵdarlamasy aıasynda uıymdastyrylǵan «Qazaqstannyń 100 jańa esimi» baıqaýynda Danıel Dıl «Mádenıet jáne sport» atalymynda jeńiske jetti. Jas jigit úshin 2790 úmitker qatysqan konkýrsta top jarý – óte úlken jetistik.
«Jasymnan sportpen aınalysqandyqtan, temirdeı tártipke úırenip ketkenmin. Bul daǵdy maǵan ómirde kóp kómegin berdi. Erinbeı eńbek etken jáne qıyndyqqa shydamdy jan bárin de jeńip shyǵady degendi aıtqym keledi», deıdi ózine-ózi senimdi jigit.
Atalǵan baıqaýdaǵy jeńis jańa múmkindikterdiń kókjıegin ashýmen birge óte zor jaýapkershilik júktegenin aıtady Danıel. Budan bylaı ol jastarǵa úlgi bolýǵa tıis tulǵa: sporttyń adamdy myqty, tózimdi jáne maqsatker etip shyǵaratynyn jas urpaqtyń sanasyna sińirýi kerek. Onyń aldynda osyndaı maqsat tur.
Danıeldiń kenshi bolyp eńbek etip júrgenine bıyl tórt jyl boldy. Onyń jeti qat jer astynda jumys isteıtinin estigen tanystary tańǵalystaryn jasyra almaı jatady. Qurmetteri de zor, árıne.
Negizinde, Danıel baǵdarlamashylyq oqý bitirgen bolatyn. Biraq bolashaq mamandyǵyn tańdar tusta I.Kostenko atyndaǵy shahtada jumys isteıtin anasynyń aqylyna qulaq túrgen. Sportpen aınalysatyn shymyr jáne óte tárbıeli jigitti kórgende shahta basshylyǵy da birden kelisim bergen edi. Sóıtip ol bir kúnniń ishinde kenshi bolyp shyǵa kelgen.
Jas jigit keıingi kezderi qalanyń qoǵamdyq-saıası ómirine belsendi túrde aralasa bastady. Byltyr Nur Otan partııasynyń múshesi retinde praımerızge qatysyp, óziniń baǵdarlamasyn jarııa etti.
«Meniń baǵdarlamam buqara arasynda balalar sportyn nasıhattaýǵa baǵyttaldy. Aımaqtarda talantty balalar óte kóp. Biraq kóbine olardyń jolyn qarjylyq másele kesedi – qandaı da bir úıirmege aqy tóleýdi kóp adamdardyń qaltasy kótere bermeıdi. Meniń oıymsha, balalar úshin sport úıirmeleri qoljetimdi bolýy kerek», deıdi ol.
Danıel Dıl bolashaqta balalaryma jaqsy áke bola alsam, maqsatyma jetkenim degen oı aıtady.
«Anam sııaqty balasynyń tabysqa jetkenin kórgen adamda arman bolýshy ma edi?!», deıdi daryndy jas Danıel.
