Qazaqstandyq avtobıznes qaýymdastyǵynyń málimetinshe, 2021 jyldyń shilde aıynda jańa kólikterdiń satylymy maýsym aıymen salystyrǵanda birshama azaıǵan. Alaıda ótken jyldyń shilde aıymen salystyratyn bolsaq atalmysh kórsetkish 41,79%-ǵa joǵary. Bul týraly Indýstrııa jáne ınfraqurylymdyq damý mınıstrligi habarlady.
Jalpy álem boıynsha mashına ónerkásibi áli de elektrondyq jıyntyqtardyń tapshylyǵyn kórip otyr. Qazaqstandyq avtobıznes qaýymdastyǵy sarapshylarynyń pikirinshe, aldaǵy aılarda áli de avtomobıl tapshylyǵy bolady. Bul Qazaqstanǵa baǵyttalǵan jetkizilimderge de áser etedi.
Qytaı arqyly qazaqstandyq júkterdiń tranzıtin shekteý máselesi de aıtarlyqtaı qıyndyq týdyryp otyr. Búgingi tańda bul jaıt ımporttaýshylardy da alańdatady.
2021 jyldyń shilde aıynda qazaqstandyq dılerler 10 301 jeńil avtokólik pen jeńil kommersııalyq tehnıka, sondaı-aq 367 júk kóligi, arnaıy tehnıka men avtobýs satty. Jalpy jyl basynan beri 66 946 tehnıka satyldy, bul 2020 jyldyń qańtar-shilde aılaryna qaraǵanda 53,1%-ǵa kóp.
Shilde aıynda naryq úlesiniń 29% quraıtyn brendterdiń ondyǵyn Chevrolet bastady – 3 094, ekinshi orynda Hyundai kólikteri – 2012 (úlesi 18,9%). Sońǵy eki aı boıy úshinshi orynda turǵan Kia brendiniń – 1 216 tehnıkasy satylǵan. Toyota dılerleri shilde aıynda 1 199 avtokólik satty. Eń kóp satylatyn brendterdiń ishinde besinshi orynda LADA tur – 518 tehnıka. Altynshy orynda Volkswagen (448 birlik), jetinshi orynda pozısııalardyń ózgerýi baıqalady– Renault satylymy Nissan-nan asyp tústi (285 birlik jáne 264 birlik). Al, ondyqty JAC (201 birlik) jáne Haval (141 birlik) qorytyndylaıdy.
2021 jyldyń shilde aıyndaǵy eń tanymal top-10 model: Chevrolet Cobalt – (1 555 birlik), Chevrolet Nexia – (1 246 birlik) jáne Hyundai Accent - (830 birlik). Budan ári tizim boıynsha: Kia Rio (662 birlik), Toyota Camry (490 birlik), Volkswagen Polo (323 birlik), Kia Sportage (290 birlik), Hyundai Creta (280 birlik), Hyundai Sonata (276 birlik), Toyota Rav4 (261 birlik).
