О́tken jyldyń mamyr aıynda «Nur Otan» partııasynyń Almaty qalalyq fılıaly janyndaǵy Jemqorlyqqa qarsy kúres qoǵamdyq keńesi Almaty qalasy boıynsha sot aktilerin oryndaý departamentiniń jumysyn qaraǵan bolatyn. Aldyn ala tekserý qorytyndysynda kórsetilgenindeı, atalǵan departamentte basshynyń turaqtamaýy (bir jylda úsh basshy aýysqan), qarjy polısııasy tarapynan departamenttiń birneshe qyzmetkerine qylmystyq istiń qozǵalýy, prokýrorlyq qadaǵalaý aktisimen 168 laýazymdy qyzmetkerdiń tártiptik jaýapkershilikke tartylǵany, 65 adamnyń jumystan bosatylýy (onyń ishinde jumys ótili 3 jyldan joǵary 46 sot oryndaýshy), sol kezeńde 19 sot oryndaýshynyń orny bos turǵany tilge tıek etilip, syn tezine ushyraǵan edi. Keńes jumysyna qatysqan osy joldardyń avtory «Egemen Qazaqstannyń» ótken jylǵy №125 sanynda «Bardak» degen maqala jarııalaǵan bolatyn.
О́tken jyldyń mamyr aıynda «Nur Otan» partııasynyń Almaty qalalyq fılıaly janyndaǵy Jemqorlyqqa qarsy kúres qoǵamdyq keńesi Almaty qalasy boıynsha sot aktilerin oryndaý departamentiniń jumysyn qaraǵan bolatyn. Aldyn ala tekserý qorytyndysynda kórsetilgenindeı, atalǵan departamentte basshynyń turaqtamaýy (bir jylda úsh basshy aýysqan), qarjy polısııasy tarapynan departamenttiń birneshe qyzmetkerine qylmystyq istiń qozǵalýy, prokýrorlyq qadaǵalaý aktisimen 168 laýazymdy qyzmetkerdiń tártiptik jaýapkershilikke tartylǵany, 65 adamnyń jumystan bosatylýy (onyń ishinde jumys ótili 3 jyldan joǵary 46 sot oryndaýshy), sol kezeńde 19 sot oryndaýshynyń orny bos turǵany tilge tıek etilip, syn tezine ushyraǵan edi. Keńes jumysyna qatysqan osy joldardyń avtory «Egemen Qazaqstannyń» ótken jylǵy №125 sanynda «Bardak» degen maqala jarııalaǵan bolatyn.
Elimizdegi sot oryndaýshylardyń jumysyndaǵy kemshilikter, keleńsizdikter jóninde az aıtylyp júrgen joq. Aıtylǵan áńgimeden shyǵyp jatqan nátıje de shamaly. Tilge tıek bolǵan atalmysh otyrysta synǵa ushyraǵan departamenttiń basshysy A.Apıev te sóılegen bolatyn. Ol osy otyrysta aıtylǵan syndardy qabyldaıtynyn, mundaı kemshilikterdiń departament jumysynda oryn alyp otyrǵanyn aıta kele, óziniń bul qyzmetke jańadan taǵaıyndalǵanyn, aldaǵy ýaqytta departament jumysyn jaqsartýǵa bar kúsh-jigerin jumsaıtynyn aıtyp sendirgen-di. Qoǵamdyq keńes bul máselege qaıta oralatynyn, jyl aıaǵyna qaraı departament jumysyn qaıta tekseretini týraly sheshim qabyldaǵan bolatyn. Degenmen, ótken jyly bul sheshim oryndalmaı qaldy. Esesine, departament basshysy A.Apıev redaksııamyzǵa habarlasyp, toǵyz aıda atqarylǵan jumys týraly málimetin usyndy.
«Ústimizdegi jyldyń mamyr aıynda «Nur Otan» partııasynyń Almaty qalalyq fılıaly janyndaǵy Jemqorlyqqa qarsy kúres qoǵamdyq keńesinde men basqaryp otyrǵan Almaty qalalyq Sot aktilerin oryndaý departamentiniń jumysyn qaralǵan bolatyn. Osy otyrysta sot oryndaýshylarynyń jumysy ótkir synǵa ushyraǵan edi. Tekserý qorytyndysynda kórsetilgendeı, aldyńǵy 2012 jyl departament úshin óte qıyn jyl bolǵany ras. Maǵan deıin eki basshy aýystyrylǵan. Toǵyz qyzmetkerimiz jemqorlyq qylmysqa qatysty sottalǵan. Oryndalǵan qujattardyń sany eki esege azaıǵan. 65 qyzmetker ártúrli sebeptermen qyzmetinen bosaǵan. Menińshe, máseleniń bulaı órbýi birneshe ózekti problemalardyń saldary – jumys aýqymynyń birte-birte kóbeıýi, tómen jalaqy, eski jáne mardymsyz zańnamalar, eńbek jaǵdaıynyń nasharlyǵy dep bilemin.
Sol qoǵamdyq keńeste ýáde bergenimdeı, men sheshilmeı jatqan biraz problemalardy qozǵaýǵa tyrystym. Sol kezde bizge jańadan ǵımarat berilgen. Men osy ǵımaratty jóndeý ǵana emes, qyzmetkerlerimizge laıyqty jumys ornyn daıyndaýǵa nazar aýdardym. Eń bastysy, qyzmetkerlerge de kelgen azamattarǵa da yńǵaıly jumys jaǵdaıyn uıymdastyrdyq. Búkil sot oryndaýshylardyń bólmeleri kompıýterlik tehnıkamen jabdyqtaldy jáne aqparattyq-izdestirý júıesine qosyldy. Soǵan baılanysty qazirgi kezde qaǵaz qujattarynyń aınalymy biraz qysqardy. Endi burynǵydaı emes, suranys hattardyń jaýaptaryn elektrondy ádispen alýǵa bolady. Degenmen, bul baǵyttaǵy jumystardy ári qaraı jetildirý qajet. Osy kúnge deıin bankterdiń málimetteri jáne qoıatyn tyıymdardy sheshý qaǵaz júzinde ǵana oryndalyp kelgen.
Sondaı-aq, bos laýazymdy qyzmetkerlerdiń ornyna perspektıvalyq qyzmetkerlerdi qabyldadyq. Ishki tártipti kúsheıttik. Qoldanǵan sharalardyń nátıjesinde atqarýshylyq qaǵazdardyń 30 paıyzdan astam kóbeıýine qaramastan, tolyq oryndalǵan atqarý qujattary eki esege deıin ósti. О́tken jyldary málimet bazasyna engizilmegen atqarý qujattary búgingi kúni tolyq engizilip, arnaıy is-sharalar ótkizip, memlekettik bıýdjet paıdasyna 20 myńnan astam atqarý qujattary oryndaldy.
Sot oryndaý júıesindegi negizgi problemanyń biri – atqarý óndirisiniń kóptigi ekeni ras. Birneshe jyldan beri sot oryndaýshylarǵa túsetin qujattardyń kólemi óse túsýde. Sol ýaqyttan beri qyzmetkerler kerisinshe eki ret 30 paıyzǵa qysqartylǵan. Qazirgi kezde jeke sot oryndaý ınstıtýty qurylǵanyna qaramastan, bir memlekettik sot oryndaýshynyń quzyretinde myńnan astam qujattar bar. Meniń oıymsha, bul ózekti máseleni sheshý tek sot oryndaýshylardyń sanyn kóbeıtýmen sheshilmeıdi. Árbir azamat, memlekettik qyzmetker, atqarý organdarynyń qıynshylyǵyn, mańyzdylyǵyn uǵyný qajet. Aıtyp otyrǵanymnan basqa da sheshimin tappaı otyrǵan máseleler áli de jeterlik. О́tken jyly Ádilet mınıstrligi Sot aktilerin oryndaý komıtetiniń kómegimen materıaldyq-tehnıkalyq bazamyzdy biraz nyǵaıtyp aldyq. Máselen, 2012 jyly departament balansynda bir ǵana qyzmettik kólik bolsa, búgingi kúni búkil 12 aýmaqtyq bólimimiz kólikpen qamtamasyz etilgen.
«Kósh júre túzeledi» deıdi halyq danalyǵy. Búgingi kúnge deıin tóbesinen syn toqpaǵy arylmaı kele jatqan sot oryndaýshylarynyń jumysy birte-birte jolǵa qoıylyp keledi. Eń bastysy, aıtylǵan synnan nátıje shyǵarýdy qolǵa aldyq. Tyndyrylǵan sharýa az emes, atqarylar jumystar da jeterlik».
Joǵaryda tilge tıek etkenimizdeı, Jemqorlyqpen kúres komıssııasynyń Almaty qalasy boıynsha sot oryndaýshylar departamentiniń jumysyn qaıta qaraıtyny týraly sheshimi oryndalmaǵanymen, sol departamenttiń dırektory Arman Apıevtiń biz jazǵan maqalaǵa kóńil aýdaryp, ózi ýáde etkenindeı araǵa ýaqyt salyp habarlasyp jatýy, osy aralyqta tyndyrylǵan ister jóninde anyqtamany usynýy departamentke jańadan kelgen jas basshynyń jumysqa degen ynta-yqylasyn bildirgendeı. Máselen, kóptegen basshylar ózderiniń jumysyna qatysty aıtylǵan synǵa nemquraıly qarasa, al Arman Apıevtiń departament jumysyn synaǵan maqalaǵa qatysty óz pikirin bildirip jáne aıtylǵan ýaqyt ishinde atqarylǵan jumystary týraly anyqtama berýi onyń óz jumysyna degen oń kózqarasyn bildirse kerek...
Sharafaddın ÁMIROV,
«Egemen Qazaqstan».
ALMATY.
