Qorǵanys vedomstvosynyń basshysy konkýrstarǵa qatysýshylar aldynda sóılegen sózinde Armııalyq halyqaralyq oıyndardy ótkizý aýqymy iri álemdik birinshilikpen bir deńgeıde ekenin atap ótti.
«Armııalyq oıyndardaǵy saıystar – bul nysanany zaqymdaýda dáldik pen mergendikti, ártúrli qarýdy meńgerýde sheberlikti, minsiz dene daıyndyǵy men tózimdilikti, áskerı tehnıkany basqarýdaǵy senimdi daǵdylardy kórsetý. Armııa oıyndary áskerı qyzmetshilerdi beıtanys jerde, psıhoemosıonaldyq shıelenis jaǵdaıynda áreket etýge májbúrleýmen de qyzyqty», dep atap ótti Qorǵanys mınıstri.
Jeti jyl ishinde Armııalyq halyqaralyq oıyndarǵa qatysýshy elderdiń sany 17 memleketten 44-ke deıin eki eseden asa artty. Konkýrstardyń barlyq kezeńi qazirgi zamanǵy shynaıy urys jaǵdaıyna barynsha jaqyndatylǵan.
Armııalyq oıyndardyń jaýyngerlik mashyqty arttyrýdaǵy mańyzyn atap ótken general-leıtenant Nurlan Ermekbaev:
Áskerı qyzmetshiler oqý-jattyǵý polıgondarynda naqty jáne úılesimdi áreket etse, onda olardyń keminde 80%-i jaýyngerlik jaǵdaıda da dál osylaı áreket etetinin óz isin jete meńgergen kásibı áskerıler jaqsy biledi, dedi.
Bıyl Jambyl oblysyndaǵy 40-ynshy áskerı bazanyń aýmaǵynda armııalyq oıyndardyń 2 konkýrsy – mınaatqyshtar esep toptary arasyndaǵy «Artıllerııadan oq atý sheberi» jáne UUA mamandarynyń «Suńqar ańshylyǵy» saıystary ótedi. Qazaqstan jaýyngerleri áskerı saıystarda árdaıym joǵary nátıjeler kórsetip, osy konkýrstarda udaıy alda bolyp keledi.
Oıyndarǵa qatysý úshin «Mátibulaq» polıgonyna 8 elden artıllerıster jáne 4 memleket armııasynan ushqyshsyz ushý apparattarynyń eseptoptary keldi. Konkýrstarǵa 3 elden kelgen ókilder baqylaýshy retinde qatysady.
«Áskerı qyzmetshiler urys dalasynda emes, sport saıystarynda kúsh synasýy progressıvti jol. Qazaqstandyq armııa eldiń egemendigi men qaýipsizdigin qorǵaýǵa qabiletti dep nyq senimmen aıta alamyn. Agressordyń áleýeti óte qýatty, zamanaýı áskeri bolǵannyń ózinde, túrli turaqty emes áskerılendirilgen quramalardy aıtpaǵanda, kem degende aıqyn, aýyr asımmetrııalyq soqqy berýge qabilettimiz. Daıarlyqty joǵary deńgeıde ustaý úshin udaıy jattyǵamyz. Ári qazaqstandyq armııa júıeli túrde jetildirilýde», dedi qorytyndy sózinde general-leıtenant Nurlan Ermekbaev.
El aýmaǵynda ótip jatqan Armııalyq halyqaralyq oıyndar aǵymdaǵy jylǵy 2 qyrkúıekke deıin jalǵasady.
