Kezdesý barysynda óńir basshysy Rýhııanyń talanty men eńbekqorlyǵynyń arqasynda halyqaralyq arenada Qazaqstannyń dańqyn shyǵarǵanyn atap ótti.
«Siz osy aıtýly jarystyń jeńimpazy atanǵanyńyzdy estigende qatty qýandym. Bul - úlken jetistik! Qazaqstandy álemdik deńgeıde taǵy bir ret tanyttyńyz. Árıne, talantyńyz talassyz, biraq jeńiske jetýińizge qajyrly eńbegińiz ben alǵa umtylysyńyz sebep boldy. Roza Baǵlanova, Bıbigúl Tólegenova, Álibek Dnishevterdeı shyǵarmashylyq bıikterden kórinýińizdi tileımin. Sizdi maqtan tutamyz jáne eńbekqorlyǵyńyz ben talatynyńyz bıikke shyǵaratynyna senemiz», dedi A.Batalov.
Rýhııa Baıdúkenova rızashylyǵyn bildire otyryp, jeńiske jetkizgen qupııasyn aıtty.
«Siz meni alǵashqylardyń biri bolyp qoldadyńyz. Senimińizdi aqtaı alǵanyma rızamyn. Táýelsiz Qazaqstan tarıhynda osy halyqaralyq óner festıvalinde elimiz úsh gran-prı ıelendi. Men el úshin eń mańyzdy mereıtoılyq datada óner kórsetip, jeńiske jetkenime óte qýanyshtymyn. Bul tereń sımvolıkalyq mánge ıe. Sahnada «Taldyqorǵan áýenderi» ansambliniń quramynda óner kórsettim. Taldyqorǵandyqtardyń senimi maǵan kúsh pen senimdilik berdi, jeńiske jetýge kómektesti. Sondyqtan men sizge jeńimpazdyń músinin syılaǵym keledi», dedi vokalıst R.Baıdúkenova.
Amandyq Batalov músindi Tynyshbaev atyndaǵy oblystyq tarıhı -ólketaný murajaıyna tabystady.
Rýhııanyń tálimgeri, belgili telejýrnalıst Qymbat Dosjan óz áserimen bólisti.
«Rýhııa baıqaýǵa joldama alǵan kezde qolynda tek ushaq bıleti bar edi. Birinshiden, sizdiń, Amandyq Ǵabbasuly, ýaqytynda kórsetken kómegińiz ony jigerlendirdi. Rýhııaǵa ózin dáleldeýge jáne jeńiske jetýge kómektesti. Almaty oblysynda mádenıet salasyna tıisti kóńil bólinip jatqanyna qýanyshtymyn», dedi Q.Dosjan.
Oblys ákimi mádenıet salasyn qoldaý men damytý memlekettik saıasattyń mańyzdy baǵyttarynyń biri ekenin aıtty.
Sodan keıin Rýhııa Baıdúkenova jerlesterimen kezdesti. Taldyqorǵan mesenattary men kásipkerleri oǵan Hyundai avtokóligin syıǵa tartty. Sonymen qatar Rýhııanyń ustazy Serikjamal Ájibekova men tálimgeri Qymbat Dosjanǵa 1 mıllıon teńgeden aqshalaı sertıfıkat tabys etti.
«Jerlesterińiz sizdi maqtan tutady. Talantyńyz halyqaralyq deńgeıde tanyldy. Bul ustazdaryńyzdyń úlken eńbegi. Meniń oıymsha, bul iri jeńisti basqalar jalǵastyrady. Sizge jańa tabys, shyǵarmashylyq jetistikter tileımin», dedi Taldyqorǵan qalasynyń mesenattary men kásipkerleri atynan sóılegen Aqshabaı Kerimbekov.
