Foto: SIM baspasóz qyzmeti
QR Syrtqy ister mınıstrliginde el Táýelsizdiginiń 30 jyldyǵyna arnalǵan «Qazaqstan sheteldik BAQ kózimen» VI halyqaralyq baıqaý jeńimpazdaryn marapattaý rásimi ótti.
Baıqaýdy QR SIM jáne Qazaqstan bas redaktorlar klýby uıymdastyrdy. Shara osymen altynshy ret ótkizilip otyr. Bıylǵy konkýrs QR Táýelsizdiginiń 30 jyldyǵyna arnaldy.
Baıqaý aıasynda qazylar alqasy álemniń 40-qa jýyq eliniń 60 jýrnalısiniń jumysyn qarady. Materıaldar Qazaqstanǵa qatysty ekonomıka, saıasat, halyqaralyq qatynastar, tarıh, mádenıet, týrızm, densaýlyq saqtaý, sport, ıadrolyq qarýsyzdaný, jańartylmaly energııa kózderi sııaqty aýqymdy taqyryptarǵa, sondaı-aq qazaq halqynyń kórnekti tulǵalary – Abaı Qunanbaıuly men Ábý Nasyr ál-Farabıdiń murasyna arnaldy. Baıqaýǵa qatysýshylardyń materıaly sheteldik gazetterde, jýrnaldarda, ınternet-basylymdarda jáne tanymal ınternet platformalarynda jarııalandy.
Qazylar alqasynyń sheshimimen 6 sheteldik jýrnalıst jeńimpaz atandy. Olar – «Respýblıka», «Lıtvalyq kýrer» aptalyq basylymdardyń jáne «Eho Lıtva» gazetiniń bas redaktory N.Jýkov (Lıtva), «Finančné Noviny» basylymynyń bas redaktory V.Bachıshın (Slovakııa), Pákistannyń jahandyq jáne strategııalyq zertteýler ortalyǵynyń aımaqtyq sarapshysy, doktor M.ýl-Hasan Han (Pákistan), Kanadanyń emıgrasııa jáne mýltıkýltýralızm máseleleri jónindegi burynǵy mınıstri T.Rýpreht (Kanada), «BCI Medıa» kompanııasynyń kommersııalyq prodıýseri I.Cherneı-Kelner (Kanada), jáne «MNB» telearnasynyń tilshisi S.Bat-Erdene (Monǵolııa).
Marapattaý rásimine QR Syrtqy ister mınıstriniń orynbasary Erlan Álimbaev, Qazaqstan bas redaktorlary klýbynyń prezıdenti Bıbigúl Jeksenbaı, Nur-Sultan qalasynda akkredıttelgen sheteldik dıplomatııalyq korpýstyń jáne jetekshi qazaqstandyq BAQ ókilderi qatysty.
Syrtqy ister mınıstriniń orynbasary Erlan Álimbaev jeńimpazdardy quttyqtaı otyryp, baıqaýdyń qatysýshylaryna alǵys bildirdi. Olardyń sany jyldan jylǵa artyp kele jatqanyn, ótinimder geografııasynyń keńeıgenin, sheteldik buqaralyq aqparat quraldary tarapynan Qazaqstanǵa degen qyzyǵýshylyqtyń artqanyn atap ótti. E.Álimbaev Syrtqy ister mınıstrliginiń koronavırýs pandemııasyna baılanysty shekteýlerdi saqtaı otyryp, mazmundy baǵdarlama uıymdastyrǵanyn, onyń aıasynda baıqaý jeńimpazdary Qazaqstan, onyń qazirgi damýy men 30 jyl ishinde qol jetkizgen jetistikteri týraly tolyǵyraq bilýge, halqymyzdyń qonaqjaılylyǵyn sezinýge múmkindik alatynyn aıtty.
О́z kezeginde, sheteldik jýrnalıster baıqaýdy uıymdastyrýshylarǵa alǵys aıtyp, Qazaqstannan alǵan áserlerimen bólisti.
Baıqaý jeńimpazdary Qazaqstanǵa saıahat týryna qatysýǵa, onyń ishinde Nur-Sultan, Túrkistan jáne Almaty qalalaryna, sondaı-aq Býrabaı demalys aımaǵyna barýǵa múmkindik aldy.
