Aqmolalyqtar ekspedısııa qatysýshylaryn qalanyń kireberisindegi qaqpa aldynan qarsy aldy.
Kókshetaýda oblys ákiminiń orynbasary Aına Músirálimova qoǵam qaıratkerleriniń, óńirdegi ǵalymdardyń qatysýymen kezdesý ótkizdi.
«Bul jobany oblys aýmaǵynda birinshi bolyp qarsy alý biz úshin úlken mártebe. Ekspedısııa Qazaqstan Respýblıkasy Táýelsizdiginiń 30 jyldyǵyn merekeleý aıasynda ótýde, onyń maqsaty – óńirlerdiń tarıhı-mádenı jáne týrıstik áleýetin tanytý. «Atameken» ataýy táýelsiz eldiń qasıetti birligin bildiredi. Konstıtýsııa kúnin merekeleý qarsańynda bul is-sharany ótkizýdiń sımvoldyq máni zor, elimizdiń qoǵamdyq-saıası jáne áleýmettik salalaryndaǵy barlyq jetistikteri erekshe mánge ıe», dedi qonaqtardy qarsy alǵan Aına Músirálimova.
Ákim orynbasary oblystyń sońǵy jetistikteri men merekege arnalǵan saltanatty is-sharalardyń josparlarymen tanystyrdy. Máselen, kókshetaýlyq 200 otbasy baspanaly bolsa, qalanyń quqyq qorǵaý jáne ekologııalyq qyzmetkerlerine 50 páter, arnaıy tehnıka berilipti.
«Egemen Qazaqstan» RG» AQ Basqarma tóraǵasynyń birinshi orynbasary Vladımır Kýrıatov respýblıkalyq gazettiń bul aksııasy – kıeli oryndardy zertteý jáne Respýblıkanyń týrıstik áleýetimen tanysý arqyly bolashaqqa úndeý bolatynyn atap ótti.
Ol, sondaı-aq qazir bir aksıonerlik qoǵam bolyp tabylatyn basylymdardyń redaksııalyq saıasaty týraly sóz qozǵady. Basty nazar – el ómirindegi eń mańyzdy oqıǵalar týraly jazatyn, halyqpen jáne aımaqtarmen tyǵyz baılanys ornatatyn gazetter bolý. Osy kontekstegi qazirgi aksııa – úlken jumystyń bir bóligi ekendigine toqtaldy
Sondaı-aq jýrnalıster «Egemen Qazaqstan» gazetiniń 100 jyldyǵy qarsańynda jaryq kórgen basylymdardy tartý etti. Onyń ishinde 1919-2019 jyldary jazylǵan Sáken Seıfýllın, Sábıt Muqanov, Ǵabıt Músirepov, Ábish Kekilbaev jáne t.b. avtorlardyń eń úzdik maqalalary jınaqtalǵan bestomdyq bar. О́z kezeginde ákimniń orynbasary ekspedısııa qatysýshylaryna Aqmola oblysynyń áleýmettik-ekonomıkalyq damýyna arnalǵan fotoalbom usyndy.
Kezdesý sońynda taraptar estelik syılyqtarmen almasty.
