Qazaqstan kommýnısteri ólim jazasy qalpyna kelgenin qalaıdy. Bul týraly «Jetinshi» telearna habarlady.
Parlament Májilisiniń depýtaty Vladıslav Kosarevtyń aıtýynsha, aýyr qylmystardyń jolyn ólim jazasy ǵana kese alady. Al Bas prokýratýra keıbir qylmystarǵa qatysty jazany jeńildetý týraly usynys aıtqan edi. Osyǵan oraı, V. Kosarev mynadaı málimdeme jasady: «Bas prokýratýranyń usynysy zańdy buzǵandardyń jazasyn tikeleı jeńildetý degen sóz. Qoǵam buǵan qarsy. Sebebi, qylmyskerlerden qorlyq kóretinder de osy bizdiń qarapaıym azamattarymyz».
Jalpy, jaqynda kún tártibinde qaralǵan qylmystyq zańnamanyń jumsartylýyna kommýnıster fraksııasy qarsylyq bildirdi. Olardyń paıymynsha, zań jumsaq bolsa qylmystyń sany da artady. Biraq, bul turǵydaǵy pikirler qaıshylyǵy ábden súzgiden ótkesin, bir sheshim qabyldanatyny anyq. Sondyqtan bizge naqty qorytyndy jasaý áli erterek.
Ámirhan Almaǵanbetov.
Derekkóz: «Jetinshi» telearna.
Foto: Newsparky. Livejournal.com.
