Osy jyly Rahat Álıevtiń ústinen qarjy salasynyń qyzmetkerlerin óltirgeni jáne alaıaqtyq jolmen qomaqty qarjyny jymqyrǵany úshin qylmystyq is qozǵalýy múmkin. Bul týraly Mail.ru habarlady.
Arnaıy júrgizilgen tekserý qorytyndysyna júginsek, Rahat Álıev óziniń kinásizdigin dáleldeý maqsatynda jalǵan qujattar ázirlegen. Tipti Qazaqstannyń Bas prokýrory Ashat Daýylbaevtyń da qoltańbasyn qoldan jasaǵan. Sońǵy aıtylǵandy AQSh-tyń sot-medısınalyq saraptamasynyń qyzmetkerleri dáleldep berdi.Osylaısha basyna qara bult úıirilgen Rahattyń keleńsiz isteri birtindep ashylyp jatyr. Álemdik deńgeıde aty málim bolǵan bul aıypkerdiń ózin aqtap alýǵa arnalǵan hattardy uıymdastyryp jazǵany jóninde 2010 jyly aqpar taraǵan edi. Endi, mine, Bas prokýrordyń qoltańbasyn qoldan qoıǵany málim bolyp otyr. Al osynyń aldynda Venadaǵy quqyq qorǵaý qyzmetkerlerine Dýbaıda turatyn bir azamattan Álnur Musaev pen Rahat Álıevke qatysty qujat kelip túsken eken. Ol boıynsha «Nurbank» qyzmetkerleri qaıtys bolǵan kúni Á. Musaev, R. Álıev pen bankır Lev Nahmanovıchtiń ózara sóıleskeni belgili boldy. Sonda Rahat Federaldi polısııa men eks-kansler Alfred Gýzenbaýerge jalǵan málimetter daıyndaý kerektigi týraly sóz qozǵaǵan.
Esterińizde bolsa, 2008 jyldyń 15 qańtarynda R. Álıevke «Nurbanktiń» eki qyzmetkeri Joldas Temirálıev pen Aıbar Hasenovti urlap áketti degen aıyp taǵylyp, sottyń syrttaı shyǵarǵan sheshimimen 20 jylǵa bas bostandyǵynan aıyrylǵan bolatyn. Taǵy osy jyldyń 26 naýryzynda Aqmola garnızonynyń áskerı soty Rahat Álıevke bılikti basyp alýǵa árekettendi degen aıyp taǵyp, 20 jylǵa bas bostandyǵynan aıyrýǵa syrttaı sheshim shyǵardy. Alaıda, alǵashynda Avstrııa asyp ketken Rahatty elge ákelýge sol jaqtaǵy quqyq qorǵaý qyzmetkerleriniń «oǵan elinde qysym jasalady» degen ýáji kedergi keltirdi...
Derekkóz: Mail.ru.
Foto: Forbes.kz.
