Sochıde ótetin Olımpııa oıyndary kezinde AQSh qarýly kúshteriniń eki áskerı korabli Qara teńiz aýmaǵynda kúzetke turyp, shuǵyl jaǵdaılar oryn ala qalsa, birden aralasa ketedi. Bul týraly Ras.kz habarlady.
Pentagonnyń resmı ókili kontr-admıral Djon Kerbıdiń aıtýynsha, Qara teńiz boıyn boılap júzetin AQSh áskerı korablderi men Germanııada turǵan ushaqtary qajettilik týǵan jaǵdaıda, Sochıdegi amerıkalyqtardy qater qursaýynan alyp shyǵady. CNN telekompanııasy ushaqtardyń Sochıge eki saǵattyń ishinde jetip kele alatynyn, biraq mundaı operasııalar úshin mindetti túrde reseılikter tarapynan ruqsat suralatynyn málimdedi.
Djon Kerbıdiń sózine qaraǵanda, «Qurama Shtattar Reseı úkimetine Qysqy Olımpıadany ótkizýge daıyndyq kezinde óziniń jan-jaqty qoldaýyna súıenýdi usynǵan bolatyn». «Eger Reseı úkimetimen konsýltasııa júrgizý barysynda áldeqandaı tótenshe týyndaǵan jaǵdaılarǵa baılanysty járdem kerek etilse, biz kúshimizben jáne Qara teńizde júrgen eki kememizben birge, basqa da áskerı-áýe, áskerı-teńiz quraldarymyzdy iske qosýǵa daıynbyz», – dedi ol.
Budan buryn Pentagonnyń basshysy Chak Heıgel eger Sochı Olımpıadasyn ótkizý kezeńinde reseılikter jaǵynan qaýipsizdikti qamtamasyz etýge baılanysty ótinish bolyp jatsa, oǵan qol ushyn berýge ázir ekenderin málimdegen bolatyn.
Qańtardyń 19-y kúni Reseıdiń prezıdenti Vladımır Pýtın Sochıdegi Oıyndar qaýipsizdigin saqtaýdyń óte mańyzdy da jaýapty másele ekenin aıtty. Ol osydan keıin Qara teńiz jaǵasyndaǵy qalaǵa kelip, mundaǵy jaǵdaımen tanysty. Ázirge qaýip shaqyratyndaı dabyldy ahýal joq.
Aıdar О́risbaev.
Derekkóz: Ras.kz
Foto: Rg.ru
