Aýyz sý máselesi qalaı sheshilýde?

О́ńirdi aýyz sýmen qamtý maqsatynda byltyr 5 jylǵa arnalǵan jospar jasalyp, oblystaǵy sý máselesi jan-jaq­ty zerdelenip, tirshilik náriniń tap­shylyǵyn joıý joldary josparlanǵan. Sol jospar bo­ıynsha bıyl birqatar joba iske qosylady.

Birinshisi – Aqtaý qalasy jáne oǵan irgeles orna­las­qan Munaıly, Qaraqııa aýdan­darynyń aýyldaryn aýyz sýmen jetkilikti deńgeıde qamtamasyz etý maqsatynda «Kaspıı» sý tushytý zaýytynyń qýatyn eki ese, ıaǵnı 40 myń tekshe metr­ge deıin ulǵaıtý kózdelgen edi. Qazir jumys óz deńgeıinde júrgizilýde. Respýblıkalyq bıýdjetten 2021 jylǵa de­ıin 1,0 mlrd teńge bólinip, tolyq­taı ıgerildi. Bıyl atalǵan jumystardy jalǵastyrýǵa taǵy da 6,7 mlrd teńge bólinip, tamyz aıynda jergilikti bıýdjetke tıisti qarajat tolyqtaı tústi. Jobany 2022 jyldyń basynda aıaqtaý josparlanǵan. Ekinshisi, «QazMunaıGaz» ulttyq kompanııasy «Qarajanbas» ken or­nynda táýligine 17 myń tekshe metr sý tushytatyn zaýyt salyp jatyr. Bul zaýyt bıyl jyl sońyna iske qosylady dep kútilýde. О́ndiristen aýysqan sý turǵyndardyń qajetine alynatyn bolady. Sondaı-aq «MAEK-Qazatomónerkásip» JShS-ne qarasty táýligine 24 myń tekshe metr sý tushy­ta­tyn qondyrǵy salý jos­parlanǵan. Qazir jobalyq-sme­talyq qujattamasy jasalýda. Qujat tolyq resimdelip bit­ken­nen keıin, jobany keler jyly bastaý kózdelgen. Bul jobalardy Fort-Shevchenko qa­la­synda qýaty táýligine 5 myń tekshe metrdi quraıtyn sý tushytý qondyrǵysyn NKOK kompanııasy oblys úshin áleý­mettik qoldaý aıasynda iske asy­rýdy josparlap otyr.­ Jos­­­parǵa­ sáıkes, dál osyndaı jo­ba Aqshuqyr jáne Saıyn Shapaǵatov eldi mekenderinde de salynady. Al Aqshuqyr aýylynda teńiz jaǵalaýynda 8 qudyq iske qosyldy. Bul qud­yqtar budan buryn negizi qalanyp, iske qosýǵa daıyn bolǵanymen, ártúrli sebepter­men óz jumysyn toqtatyp kelgen bolatyn. Sonymen qatar Mańǵystaý oblysy ákimi bas­pa­sóz qyzmetiniń habarla­ýynsha, «QazMunaıGaz» ulttyq kompa­nııa­sy tarapynan quny 87 mlrd teńge bolatyn Kendirli aı­ma­ǵy­nan táýligine 50 myń tekshe metr sý tushytatyn zaýyttyń qurylysy bastalady. Bul joba Jańaózen qalasy turǵyndaryn taza aýyz sýmen qamtıtyn bolady. Atalǵan jumysty iske asyratyn jańa mekeme – «QMG – Aqsý» JShS qurylyp, bastapqy qarjy bólinip, qujattary resim­delýde eken.

Turǵyndar sany jyldan-jylǵa artý ústindegi óńirde sý tap­shylyǵyn boldyrmaý maq­satynda Munaıly aýdanyn­da­ǵy Baıandy aýylynda ótken aıda táýligine 3 myń tekshe metr sý tushytatyn membrana iske qosylǵan. Budan bólek, Baıandy aýylynda qazir táýligine 1 myń tekshe metrge deıin sý tushytatyn membrana jumys istep tur. Aqpan aıynyń basynda iske qosylǵan bul membrana «Quıylys» jerasty sý ken ornynan kelgen sýdy tushytyp, Baıandy aýylyn tolyqtaı aýyz sýmen qamtamasyz etip otyr.

 –  Sonymen qatar «Quıylys – Munaıly – Aqtaý» baǵytynda jańa sý qubyry tartylady. О́ńirdegi sý kózderin izdestirý-zertteý jumystary qolǵa alyn­dy. Bul aldaǵy jyldary oblys jurtshylyǵyn sýmen qam­tý úshin naqty sharalar qabyl­daý­ǵa múmkindik beredi dep kú­ti­lýde. Atalǵan jobalar iske qosylǵanda, jaz aıynda bolatyn sý tapshylyǵyn joıyp, turǵyndardy tirshilik nárimen qamtýǵa qol jetkizemiz, – dedi ob­lys­tyq energetıka jáne TQSh basqarmasynyń basshysy B.Qartbaev.

                                   Mańǵystaý oblysy