Eýroodaqtyń ishki ister mınıstrleri Aýǵanstandaǵy oqıǵalardy, halyqaralyq qorǵaý, kóshi-qon jáne qaýipsizdik salalaryn talqylady. Brıýsseldegi kezdesýde qabyldanǵan málimdemede, Aýǵanstanmen kórshiles elder bosqyndardy qorǵaýdy qamtamasyz etý kerek delingen. Qazirgi ýaqytta EO bul másele boıynsha naqty mindettemeler alǵysy kelmeıdi.
«Osyǵan deıin bolǵan jaǵdaılarǵa súıene otyryp, EO jáne oǵan múshe memleketter kelisilgen jáne rettelgen jaýap berý sharalaryn daıyndaý arqyly zańsyz kóshi-qon qozǵalystarynyń qaıtalanýyn boldyrmaý úshin birlesip áreket etýge bel býady. Zańsyz kóshi-qondy yntalandyrýdan aýlaq bolý kerek», delingen habarlamada.
Qujatta Aýǵanstandaǵy bılikti «Talıban» basyp alǵannan keıin osyndaı oqıǵalardy boldyrmaý úshin Aýǵanstanmen kórshiles ornalasqan elderde oǵan muqtaj adamdardy tıisti qorǵaýdy qamtamasyz etý qajet ekeni jáne bul elderdi qoldaý kúsheıtilýi kerek ekeni aıtylǵan.
Sondaı-aq, Eýroodaq Aýǵanstanmen kórshi elderge bosqyndardy qabyldaý úshin qolma-qol aqsha berýdi josparlap otyr. Sonymen qatar, málimdemede Eýropaǵa qaýipti jáne zańsyz saparǵa shyǵýǵa shaqyratyndardy toqtatý kerek delingen.
Málimdemege sáıkes, qorǵaýdy qajet etetin aýǵan azamattaryn kóshirý EO memleketteri oryn usynǵan jaǵdaıda ǵana júzege asyrylýy kerek.
Buǵan deıin Eýropalyq parlament tóraǵasy Eýropalyq Odaq elderin Aýǵanstannan mıgranttardy kóshirýdi uıymdastyrý úshin sharalar qabyldaýǵa shaqyrdy. EO dıplomatııasynyń basshysy Jozep Borrel EO kóshi-qon apaty men gýmanıtarlyq daǵdarystyń aldyn alý úshin «Talıban» qozǵalysymen múmkindiginshe tezirek baılanys ornatýy kerek dedi.
