Sýomı elinde Serik Kerimbekuly keremet óner kórsetti. Bastapqy básekesinde ırlandııalyq Djozef Fenlondy sabaǵan ol shırek fınalda Eýropa birinshiliginiń kúmis jáne Jerorta teńizi oıyndarynyń qola júldegeri, ıýgoslavııalyq Sreten Mırkovıchten basym tústi. Jartylaı fınalda Majarstannyń myqtysy Tıbor Molnardy jeńgen qazaq jigiti sheshýshi saıysta Olımpııa oıyndary men álem chempıonatynyń qola júldegeri, GFR-dyń ókili Karl-Haıns Krıýgermen kúsh synasty. Nemis boksshysyn Qonaqbaev jaqsy biledi. 1979 jyly Kelnde ótken Eýropa birinshiliginde de ekeýiniń joly qıysqan edi. Sol jekpe-jekte qarsylasyn úsh márte nokdaýnǵa jibergen Seriktiń paıdasyna sheshildi. Bul joly da qandasymyzdyń myqtylyǵy esh kúmán týǵyzǵan joq. Germanııanyń dúldúlin 5:0 esebimen utqan Serik Qonaqbaev qatarynan ekinshi ret Eýropa chempıony atandy. Jáne de sol jyldyń qorytyndysy boıynsha dańqty Jambyl boks mektebiniń túlegi álemniń eń úzdik bylǵary qolǵap sheberi dep tanyldy.
Qonaqbaevtyń sporttyq ǵumyrynda jarqyn jeńister az bolǵan joq. Ol Eýropa birinshilikterindegi tabystarynan bólek, Álem kýbogyn eki ret oljalady. Álem chempıonatynyń fınalynda kúsh synasty. 1980 jyly Máskeýde alaýy tutanǵan Olımpııa oıyndarynda kúmis medaldy moınyna ildi. Fınalda ol ıtalııalyq Patrısıo Olıvadan utyldy. Negizi ǵalamdyq dodada bas júlde bizdiń jigitke buıyrýǵa tıis edi. Biraq bul básekeniń taǵdyry saıası turǵydan sheshilgenin kózi qaraqty kórermen jaqsy biledi. Sebebi Italııanyń sport basshylary óz órenderine Keńes Odaǵynda ótken Olımpıadaǵa qatysýǵa ruqsat bermedi. Basshylardyń sózine qulaq aspaǵan Patrısıo eshbir kedergilerge qaramastan tórt jylda bir ótetin baıraqty básekede baq synaýǵa bel býdy. Táýekel dedi de, óz qarajatymen Máskeýge keldi. Mine, osy jaıttyń barlyǵyn eskergen jarys qojaıyndary álemdik qoǵamdastyq aldynda upaı jınaý maqsatymen kapıtalıstik elden kelgen sportshynyń jeńiske jetýine qolaıly jaǵdaıdyń barlyǵyn jasady.
Tamperedegi Eýropa chempıonatynda jambyldyq Serik Qonaqbaevtan bólek, KSRO quramasy sapyndaǵy boksshylar arasynda magadandyq Vıktor Rybakov (60 kılo), kýıbyshevtik Vasılıı Shıshov (63,5 kılo), máskeýlik Aleksandr Koshkın (71 kılo), estonııalyq Iýrıı Torbek (75 kılo), kostromalyq Aleksandr Krýpın (81 kılo) jáne ýkraınalyq Vıktor Mıroshnıchenko (54 kılo) men Aleksandr Iаgýbkın (91 kılo) top jardy. Al qalǵan salmaq dárejeleriniń bas júldesi bolgarııalyq Ivaılo Marınov (48 kılo) pen Petr Lesovqa (51 kılo) jáne germanııalyq Rıhard Novakovskı (57 kılo) men ıtalııalyq Franchesko Damıanıge (+91 kılo) buıyrdy.
Sýomı elindegi sol jarysta qazaqtyń taǵy bir myqty boksshysy baq synady. Ol – Serik Nurqazov. Qaraǵandy boks mektebiniń túlegi qola medaldy ıelendi. 57 kılo salmaqta synǵa túsken qandasymyz ıýgoslavııalyq Deıan Marovıch pen ırlandııalyq Damıen Fıersten basym túskenimen, jartylaı fınalda GDR-dyń ókili Rıhard Novakovskıge ese jiberdi. Shyntýaıtyna kelgende, Nurqazov dańqty qarsylasynan esh qaımyqpaı, teń dárejede aıqasqanyna Tamperedegi záýlim sport keshenine jınalǵan dúıim jurt kýá. Bul jekpe-jekte tarazy basy uzaq ýaqyt teńselip turdy. Báseke aıaqtalǵannan soń tóreshiler biraz oılana-tolǵana kele, Monreal Olımpıadasynyń kúmis, Máskeý Olımpıadasy men álem chempıonatynyń qola júldegeri, Eýropa chempıony degen dardaı ataqtary bar nemis boksshysynyń qolyn kóterdi. Esep – 3:2. Osylaısha, Rıhard fınalǵa shyqsa, bizdiń Serik qola medaldy qanaǵat tutty.
