Elimizde saıası reformalar is-júzine asyryla beredi. Aýyl ákimderiniń saılaýy aıaqtalǵannan keıin, 2024 jyly aýdan ákimderiniń saılaýy ótedi. Áıelder men jastarǵa arnalǵan 30-paıyzdyq kvotany depýtattyq mandattardy bólgen kezde saqtaý zań boıynsha talap etiledi. Múmkindigi shekteýli jandarǵa partııalyq kvota belgileý aıtyldy. Bul – óte ózekti másele. Osy problemany kóptegen azamat kótergen bolatyn.
Memlekettik til jóninde de tushymdy oılar aıtyldy. Qazaqstanda memlekettik til – qazaq tili. Memlekettik tildi bilip, meńgerý – árbir qazaqstandyqtyń paryzy jáne mindeti. Memleket qazaq tiliniń qoldaný aıasyn arttyrýdy jalǵastyra beredi. Bul qadamdar dıalog pen kelisim rejiminde is-júzine asyrylýǵa tıis.
Bul Joldaýdy pandemııa jaǵdaıynda halqymyzdyń áleýmettik jaǵdaıyn turaqty ustap turyp, jaqsartýdyń tóte joly deýge bolady. Meniń oıymsha, Joldaýdaǵy jańalyqtyń biri – eń tómengi jalaqy mólsheriniń artýy. Ol 2022 jyldyń 1 qańtarynan bastap 60 myń teńgege deıin ósedi. Bul shara halqymyzdyń 2 mln azamatynyń turmys jaǵdaıyn jaqsartady.
Mádenıet, muraǵat salasy qyzmetkerleriniń, kitaphanashylardyń jalaqysy 2025 jylǵa deıin jyl saıyn 20 paıyzǵa ósedi. Azamattyq qyzmetshilerdiń jalaqysyn arttyrý da óte mańyzdy. О́ıtkeni memlekettik qyzmetshilerdiń jalaqysy kóbeıgende bul sala mamandarynyń eńbekaqysy kóterilmeı qalyp otyrdy. Endi osy kúnge de jettik, azamattyq qyzmetkerlerdiń jalaqysy óspek.
Elimizde 6,5 mln adam – jaldamaly qyzmetkerler. Osy azamattardyń jalaqysyn júıeli túrde arttyrý úshin bızneske yntalandyrý sharalary jasalady. Bul da halqymyzdyń áleýmettik standarttaryn arttyryp, damytý úshin mańyzdy qadam.
Basty másele – saıası plıýralızm, qoǵamdyq reformalar salmaqty-salıqaly, evolıýsııalyq túrde júrýi kerek. Memleket basshysy Qasym-Jomart Toqaev áleýmettik ádilettilik prınsıpteri buljymas baǵytymyz ekendigin taǵy bir qýattap berdi.
Erlan SAIROV,
Májilis depýtaty
