«2020 jyly úsh jylǵa engizilgen tekserýlerge moratorıı kassalyq tártipti tómendetti. Josyqsyz kásipkerler bul bastamany salyqtan jazasyz jaltarý múmkindigi retinde qabyldady. Osyǵan baılanysty mıkro jáne shaǵyn bıznes sýbektilerin tekserýge moratorııdi alyp tastaý máselesin qarastyrýdy usynamyz», dedi Jamaýbaev Úkimet otyrysynda.
Mınıstrdiń aıtýynsha, bul memlekettik bıýdjet kiristeriniń ulǵaıýyn qamtamasyz etýge múmkindik beredi.
Sondaı-aq ol halyqaralyq tájirıbeni eskere otyryp, Qarjy mınıstrligi qashyqtyqtan ózara is-qımylǵa negizdelgen iri bıznestiń kóldeneń monıtorıngi boıynsha jobany bastaǵanyn aıtty.
Kapıtaldy shetelge shyǵarýǵa jáne ekonomıkany deofshorlaýǵa qarsy is-qımyl boıynsha da keshendi jumys júrip jatqany aıtyldy.
Eske salaıyq, 2019 jyldyń jeltoqsanynda Prezıdent Qasym-Jomart Toqaev shaǵyn kásipkerlik sýbektilerin, sonyń ishinde mıkrokásipkerlik sýbektilerdi tekserý men profılaktıkalyq baqylaý men qadaǵalaýǵa moratorıı engizý týraly jarlyqqa qol qoıǵan bolatyn.
