Bul týraly centralasian.org aqparattyq portaly málimdedi.
Iodtalǵan as tuzyn óndiretin kásiporyn aldyna 1 qyrkúıekten bastap jınalǵan jumysshylar jalaqyny kóbeıtýdi suraıdy. Olar «Araltuz» Aksıonerlik qoǵamy 2014 jyldan beri jumysshylar jalaqysyn kóbeıtpegenin, qazirgi jalaqylary 48 myń teńge ekenin aıtady. Aral óńiriniń ekologııalyq apat aımaǵy bolyp sanalýyna baılanysty jalaqylaryna 50 paıyz koeffısıent qosylady.
«Beıbit talap qoıyp turmyz. Jalaqymyzdy 100 myń teńgege jetkizsin», deıdi jumysshy Aqyljan Qıylbaev.
Tuz zaýyty jumysshylarynyń biri Baýyrjan Sársenbekovtiń sózinshe, jalaqyny kóbeıtý jóninde zaýyt basshylyǵyna bir aı buryn jazbasha da talap qoıylǵan.
Jumysshylardyń aldyn ala eskertkenin «Araltuz» AQ kásipodaq komıtetiniń tóraǵasy Tólegen Jaınazarov ta rastady.
«Jumysshylarmen birge basshylyqqa bardyq. Olar naqty jaýap bergisi kelmedi», deıdi ol.
«Araltuz» Aksıonerlik qoǵamy tuz óndirý jáne qaıta óńdeý salasyndaǵy iri kásiporyn. Kompanııa málimetterine qaraǵanda, jylyna 450 myń tonnaǵa jýyq tuz óndirip, onyń 75 paıyzyn Reseı, Qyrǵyzstan, О́zbekstan, Ýkraınaǵa eksporttaıdy. 1200-den asa qyzmetkeri bar.
Kompanııa saıtyndaǵy málimetterde «2021 jyldyń 1 naýryzynan bastap zaýyt jumysshylarynyń jalaqasy orta eseppen 10 paıyzǵa kóbeıedi» dep kórsetilgen.
