Birinshi kezekte Prezıdent eń tómengi jalaqy mólsherin 60 myń teńgege deıin kóterýdi tapsyrdy. Bul qadam tabys deńgeıi tómen azamattardyń ekonomıkalyq belsendiligin arttyrady, sondaı-aq eldiń ishki jalpy ónimin 1,5%-ǵa arttyrady. Alaıda bul bastama, eń aldymen, otandastarymyzdyń ál-aýqatyn, ómir súrý deńgeıin arttyrýdy kózdeıdi.
Bıýdjettik uıymdardyń qyzmetkerleri memleket bastamashylyq etken jalaqyny arttyrý jónindegi sharalardyń iske asyrylýyn birinshi bolyp sezinedi. Alaıda Memleket basshysy atap ótkendeı, elimizde shamamen 6,5 mln-ǵa jýyq jaldamaly jumysshy bar. Olardyń jalaqysyn arttyrý úshin memleket bızneske qatysty «jumsaq» sharalardy qoldanatyn bolady. Mundaı qadamdar jekelegen azamattardyń tabysyn «kóleńkeden» shyǵarýǵa baǵyttalǵan. Sondaı-aq mıkro jáne shaǵyn bıznes úshin eńbekaqy tóleý qorynan biryńǵaı tólem engiziledi. Bul rette, onyń mólsheri 34%-dan 25%-ǵa deıin tómendeıdi. Bul bastamany iske asyrý úshin tólem júıesin qurý kózdelip otyr.
Prezıdenttiń taǵy bir mańyzdy bastamasy – 600 myń azamattyq qyzmetkerdiń jalaqysyn arttyrýy der edim. Olardyń jalaqysyn 2022-2025 jyldary 20%-ǵa ulǵaıtý josparlanyp otyr. Mundaı bastamany iske asyrý – asa mańyzdy. Sebebi barlyq otandastarymyz memlekettik qyzmetshilerdiń jeńildikterine qol jetkize almaıdy, ári olardyń basym kópshiliginiń jalaqysy naryqtaǵydan tómen.
Azamattardyń BJZQ-da jınaǵan artyq qarajatyn 2021 jyly turǵyn úı jaǵdaıyn jaqsartý jáne emdeý úshin paıdalaný tájirıbesi biryńǵaı turǵyn úı baǵdarlamasyn ázirleý, ári ony iske asyrý qajettiligine jeteleıdi. Prezıdent bıylǵy Joldaýda osy máselege qatysty naqty tapsyrma berdi.
Jalpy, Memleket basshysynyń Joldaýynda qazaqstandyqtardyń ómir súrý jaǵdaıyn jaqsartýǵa baǵyttalǵan eleýli áleýmettik paket bar. Sondyqtan pandemııa kezindegi memlekettik saıasattyń áleýmettik sıpatynyń sabaqtastyǵy qoǵamdaǵy turaqtylyqqa jáne eldiń saıası, ekonomıkalyq baǵytyn saqtaýǵa yqpal etedi.
Ermek TOQTAROV,
Prezıdent janyndaǵy Qazaqstan strategııalyq zertteýler ınstıtýtynyń jetekshi ǵylymı qyzmetkeri
