«Qyzyl anar» – zorlyq-zombylyqtan aman qalyp, ádildik izdegen áıeldiń oqıǵasyna qurylǵan fılm. Sharıpa Orazbaevanyń sózimen aıtsaq, «bul kezekti áleýmettik drama emes, shynaıy oqıǵalarmen órilgen poetıkalyq kıno».
Fılm rekordtyq ýaqytta, ıaǵnı 12 kúnde taspalanyp bitken. Túsirilim jumystary negizinen Almaty oblysynda ótti.
Kınofestıvalde «Qyzyl anardan» bólek Iran, Japonııa, Ońtústik Koreıa, Qytaı, Úndistan, Vetnam elderinen 10 fılm osy atalymda baq synasady. Baıqaý erejesi boıynsha qazylar alqasy eki jeńimpazdy tańdap, árqaısysy 30,000 dollar kóleminde júldege ıe bolady.
Pýsan halyqaralyq kınofestıvali – 1996 jyldan beri Ońtústik Koreıanyń Pýsan qalasynda jyl saıyn ótkiziletin Azııadaǵy eń iri baıqaý. Kıno dodasy bıyl 6-15 qazan aralyǵynda ótedi.
Aıta keteıik, «Qyzyl anar» Sharıpa Orazbaevanyń tolyqmetrajdy ekinshi týyndysy. Rejısser alǵashqy «Márııam» atty tolyqmetrajdy fılmi úshin Londonda ótken 22-halyqaralyq Rainbow Film Festival kınofestıvalinde «Úzdik rejısser áıel» atanǵan.
